КъЧР-ни сан (цифра) ёсюмюню министри, «Цифровая Россия» федерал партия проектни джергили координатору Валерий Медовый, Къарачай районну администрациясыны башчысы Къараланы Шамилге тюбеб, районда связны айнытыуну хакъындан сёлешгенди.

Экиси да Къарачай районда связны ишин игилендириуню тыйыншлы кёргенлерин чертгендиле эмда аны бла байламлы баджарыллыкъ ишлени эсеблегендиле. Алайды да, узакъ бармай Къарт-Джуртда, Огъары Марада, Тёбен Тебердиде джангы база станцияла къураллыкъдыла.
Бу вышкала ишлеб тебреселе, юч элни адамлары эмда социал объектлери связь бла да, къызыу джюрюшлю интернет бла да кереклисича баджарыллыкъдыла.
Базалы станцияла Къарачай-Черкес Республиканы Правительствосу бла «ВымпелКом» (бренд «Билайн») ПАО-ну иш джюрютюулерини тамалында къуруллукъдула. Кесаматда айтылгъаннга кёре, связь сетлени кенгертиу бла джарашдырыу КъЧР-де 2028-чи джылгъа дери барлыкъды.
Аны бла бирге КъЧР-ни Сан министерствосу, «Мегафонну» регионал бёлюмю бла биргелей, «А–155» федерал трассаны тинтиб, связь системаланы базасын орнатыуну къайгъысын кёргендиле. Бардырылгъан ишни тамалында Къарачай районну юч джеринде вышка орнатыллыкъды.
5-6 километр джол деменгили связь бла баджарыллыкъды, туристле бек джаратхан Гоначхир да аны ичиндеди.