Элия (июль) айны 6-да КъЧР-ни Башчысы Темрезланы Рашид Алийланы Умарны атын джюрютген Къарачай-Черкес кърал университетни ректоруну борчларын толтургъан Ёзденланы Умар бла тюбешгенди.

Тюбешиуде ВУЗ-ну ёсмюню, тыйыншлы кадрла хазырлауну юсюнден сёлешиннгенди.
Темрезланы Рашид чертгенден, КъЧКъУ эртдеден бери да регионну школларын устазла бла баджаргъан алчы окъуу заведениеди. РФ-ны Президенти Владимир Путин устазгъа законну тамалында энчи статус бериуню юсюнден оюмну джакълагъаныны юсюнден да айтханды. Алай бла, устазлагъа билимлерин ёсдюрюрча мадарла къураллыкъдыла.
Тюбешиуде къралны Президентини Эресейни халкъларыны тиллерин, маданиятларын сакълауну хакъындан буйругъун толтуруугъа да эс бёлюннгенди. Къарачай-Черкес кърал университет регионну маданият байлыгъын сакълайды, ана тилледен устазланы хазырлау программаларын заманны излемине кёре джарашдыргъанлай турады. Темрезланы Рашид джаш эмда тири къымылдагъан устазланы ана тиллени дараджаларын кёлтюрюуге къошаргъа, устазны ишини сыйын ёсдюрюрге чакъыргъанды.
КъЧР-ни Башчысы университетни коллективине, джаш тёлюню патриот сезимлерин ёсдюрюу бла байламлы ишлери ючюн, разылыгъын билдиргенди. Темрез улу устазла бла студентле аскерчилеге, аланы юйдегилерине болушлукъ этиуге терен эс бёлгенлерин да чертгенди.