Кёб болмай Къобан районну Кавказский посёлогунда джангы ишленнген Джарыкълыкъ юйню ачылыуу болду. Ол къууанчха Къарачай-Черкес Республиканы Башчысы Темрезланы Рашид да келген эди.
- Бусагъатда Къарачай-Черкесияда джашагъан халкъланы миллет адетлери бла маданиятларын сакълау эмда айнытыу къралыбызны эм баш ишлерини бириди. Бизге аллай борчну В. В. Путин салгъанды. Мен а, багъалы джердешлерим, бу Джарыкълыкъ юй бизни халкъларыбызны культураларын, ашхы адетлерин сакъларыкъ, айнытырыкъ эмда терен фахмуларыбызны ёсдюрлюк аралыкъ болуб къалыр, деб ышанама.
Бу чурум бизге эки къат къууанчды. Нек дегенде, бу иш Ата джуртну Къоруулаучуну кюнюню аллы бла бола турады.
Къралыбызны къоркъуусузлугъун бегитирге КъЧР-ни джамагъаты, аны ичинде Къобан районну эмда Кавказский посёлокну адамлары да уллу юлюш къошхандыла. Алайды да, таза джюрекден Уллу Ата джурт къазауатны ветеранларын, Сауутлу Кючлени ветеранларын, аскерчилени, къралыбызны эндиги къоруулаучуларын эмда Къарачай-Черкесияны бютеу джамагъатын Ата джуртну Къоруулаучусуну кюню бла алгъышлайма! - деди республиканы Башчысы.
Андан сора Темрезланы Рашид районну Водораздельный элинде Джарыкълыкъ юйню директоруна, Косенко Аллагъа, «Къарачай-Черкес Республиканы культурасыны махтаулу къуллукъчусу» деген атны бериб, джылы алгъышлады. «Сударушка» деген вокал бёлекни джырчысы Неманова Людмила бла алайда суратлау ишлени бардырыуну тамадасы Хапаланы Людмиланы да, джетишимлери бла алгъышлай, КъЧР-ни Башчысыны Бюсюреу къагъытын бериб, джылы алгъышлады эмда джангы ачылгъан Джарыкълыкъ юйню директору Мурдалов Ширваниге джангы мекямны ачхычын берди.
Ол кюннгю къууанчха келгенлеге атаб республика бла районну белгили джырчылары концерт кёргюздюле. Районну школларында окъугъан сохталадан къуралгъан юнармеецле уа, барыб, «Ёмюрлюк от» стеллагъа гокка хансла салдыла.
Къобан районда бу Джарыкълыкъ юй арт кёзюуде биринчи ишленнген мекям тюлдю. Районда саулай да 5 джангы сабий сад, Холоднородниковское элде да бир школ бла сабий сад, Дружба элде физкультура-саулукъ сакълау комплекс, Къобан районну 10 элин бир-бирлери бла байламлы этиб тургъан, кёпюрю да болгъан уллу джол, Чапаевское элде 55 фатарлы юй ишленнгендиле.
Джарыкълыкъ юйню ачхандан сора, республиканы Башчысы районну эл советлерини тамадалары бла Шахарланы эмда эллени айбат этиуню джылын тыйыншлы дараджада ётдюрюуню юсюнден кенгеш бардырды.
- Ол джумушла кеси башларына оноулу джергили органланы иш борчлары болгъанлыкъгъа, - деди Темрезланы Рашид, - этиллик затлагъа не республиканы Правительствосу, не республикан учреждениелени тамадалары бир джанындан къараб къаллыкъ тюлдюле. Быллай кенгешлени биригиб, ол ишлени биргелей тындырыр ючюн бардырабыз.
Регионну Башчысыны излеми бла аллай ишлени тындырыуну тамалында элчилени тилеклери боллукъдула эмда бардырыллыкъдыла. Артыкъсыз да ол джаны бла Къобан районну адамларыны тириликлери эртдеден да белгилидиле.
- Мен Майский посёлокну джамагъатыны кёбчюлюк этген ишледе джетишимлерин башхалагъа юлгюге айтханлай турама. Ол посёлокну адамлары, кеслери мамматлыкъ къураб, джашагъан юйлерини тёгереклерин, арбазларын тазалаб турадыла, эл Советни администрациясы да алагъа болушады, джарайды. Башха эллени администрацияларыны башчылары да ол халда ишлерге керекдиле, - деди Темрезланы Рашид.
Къобан районну башчысы Къазийланы Хусейн да элчилени арбазларын кирсиз тутаргъа, эллерин да айбатлы этерге учундура, районда, ол ишледе алчы болгъан адамлагъа энчи ёчле-грантла къуралгъанларын билдирди республиканы Башчысына.
