Мындан алда Россия Федерацияны Премьер-министри Дмитрий Медведев Грозный шахарда къралны Правительство комиссиясыны, Шимал Кавказ федерал округну социал-экономика ёсюмюню, адамла иш къоллу болууну, урунуу келишиуню тюзетиуню сорууларына аталгъан кенгешин бардырды.

 Алайгъа баргъанланы арасында Россия Федерацияны Правительствосуну Председателини заместители Александр Хлопонин,  Россия Федерацияны Шимал Кавказны ишлерини юслеринден министри Лев Кузнецов, Россия Федерацияны урунуу бла социал джакълыгъыны министри Максим Топилин, Россия Федерацияны окъуу бла илму министри Ольга Васильева эмда Шимал Кавказ федерал округну республикаларыны башчылары болгъандыла. Ол кенгешге Къарачай-Черкес Республиканы Башчысы Темрезланы Рашид да къошулгъан эди.


Правительствону Председатели округда иги джанына тюрлениуле болгъанларын чертди. Алай болса да, ишсизлик адамланы къыйнар ючюн къоймайды деб, Шимал Кавказ федерал округну республикаларыны адам саны ёсюб баргъанын, иш орунла да азыракъ болгъанларын айтды.
«Округну кесини энчи спецификасы барды. Мында кёб джаш адам джашайды. Ата-бабаларындан келген ашхы адетлерине кёре юйдегиледе кёб сабий барды. Ала юйдегилери бла бирлешиб иш ачадыла, бизнес бла кюреширге тырмашадыла. Ол магъаналы башламланы кърал къуллукъчула эсебге алыргъа керекдиле. 2010-чу джыл Шимал Кавказ федерал округ къуралгъанындан сора бардырылгъан ишледен кёб магъаналы зат болгъан эди. Эсигизге салайым, ол заманда орун алгъан ишсизлик ортача айтсакъ, бюгюнлюкде юч кереге аз богъанды. Иш орну болмагъан бир миллион адамдан 135 минг адам къалгъанды. Алай болса да, бютеуроссия дараджада къарасакъ, мында ишсизлик эки кереге кёбдю. Иш орунла къурар ючюн, биз да болушханлай турабыз», - деди кесини сёзюнде Россияны Правительствосуну Председатели Дмитрий Медведев.
Андан сора оноулары этилирге керекли проблемаланы юслеринден айтды. Ол чертгенден, округда кадрланы хазырлауну системасын джангыртыргъа тыйыншлыды. Экономиканы излемин толтура, аны ёсдюрюрге мадар берлик кючге таяна ишленсе игиди. Ишчилени къралны башха регионларында да джарарыкъ санагъатлагъа хазырларгъа тыйыншлыды. Мында иш табалмагъан, башха джерде иш къоллу болурча мадарла къуралсала игиди.
Дмитрий Медведев дагъыда ишсизликни юсюден сёлеше, адамлагъа иш табхан регионал къуллукъла къарыусуз ишлегенлерин айтды. Премьер-министр, джыллары джетмеген сабийлени кърал кёзюулю ишге сала, къошакъ профессионал билим бере, профессионал дараджада окъутуб, къайгъырыб кюрешгенини юсюнден адамлагъа билдирирге кереклисин да айтды.
«Бизни, сизни бла бирге, баш борчубуз, хар адам джашагъан джеринде, шахарда, элде, ишлеб къууаныб джашарча этиудю. Аны ючюн, регионал, правительство дараджада биригиб ишлерге керекбиз», - деди Дмитрий Медведев.
Андан сора Къарачай-Черкес Республиканы Башчысы Темрезланы Рашид Россияны Правительствосуну Председателине ишсизликни аз этер джанындан Къарачай-Черкесияда къаллай ишле бардырылгъанларыны юслеринден айтды.
«Промышленность, туризм санагъатлада инвестицион проектлени джашаугъа кийириб, эл мюлкде уруннганланы джакълаб, иш орунла этгенден сора да, 10 минг орун къурагъан сабий садланы къурулушу бизге 2,5 минг адамны иш къоллу этерге мадар бергенди. Социал сферадан сора да, урунуу рынок излеген  усталыкъла хазырлай,   биз керти производствону ёсюмюне терен эс бёлебиз», - деди кенгешде републиканы Башчысы.
Ол андан сора да республикада школладан башлаб, производство  джаш усталаны хазырларча регионал программа джарашдырыла тургъанын айтды.

 
{jcomments}