Мындан алда Узбекистанны Фергана шахарында белибаулада тутушдан дунияны биринчилиги ючюн 15-17 джыл болгъан джаш къауумну арасында эришиуле ётгендиле. Алагъа бизни спортчуларыбыз да къошулгъандыла.

Гёджеблерибиз джетишимли болуб, республикабызны спорт хазнасына джети медаль къошхандыла.
КъЧР-ни Башчысы Темрезланы Рашид МАХ-да кесини официал каналында джетишимли джердешлерибизни хорламлары бла алгъышлагъанды. 30 къралдан 300-ге джууукъ спортчу къошулгъан мийик дараджалы эришиуледе ала кеслерини кючлерин кёргюзгенлерин чертгенди Темрез улу.
«Эришиуледе Къалаханланы Арафат бла Аппакъланы Асхат кеслерини ауурлукъларында биринчи орунланы алыб, алтын медаллагъа ие болгъандыла. Къоджакъланы Темирлан, Ачабайланы Мурат, Гочияланы Рустам, Семенланы Айдамир да ючюнчю орунлагъа чыкъгъандыла. Семенланы Айдамир бу тутушну дагъыда башха тюрлюсюнде (классика стиль) эришиб, экинчи оруннга тыйыншлы болуб, кюмюш медаль бла саугъаланнганды.
Белибаулада тутуш Къарачай-Черкесияда миллет спорт болуб бурундан бери келеди. Аны себебли бютеу Кавказда джашагъан халкъланы тин-культура хазналарыны къурамына киреди. Спортну бу тюлюсю не джаны бла да джаш адамны, артыкъсыз да бек эркиши сабийни, санын чыныкъдырыргъа, хорламла этерге учундурургъа, анга тёзюмлюлюкню, батырлыкъны шартларын сингдирирге уллу себеблик этеди. Аланы тутушха юретген, эришиулеге хазырлагъан устазларына да джюрек разылыгъымы билдирирге излейме. Мындан ары да, Къарачай-Черкесияны, Эресейни атларын айтдырырлай, чемпионларыбызгъа джетишимле теджейме», – деб джазгъанды КъЧР-ни Башчысы Темрезланы Рашид.

БАТЧАЛАНЫ Фатима.