Эресейни МВД-ны информацион-коммуникацион технологияланы хайырландырыб этилген аманлыкъ ишлеге къаршчы кюреш бардыргъан управлениеси «Drama RAT» деген программа телефонлагъа заран салгъанын ачыкълагъанды.

Ол заранлы программа телефоннга салынса, аманлыкъчыла дистанцион халда адамны энчи хапарын билирге, банк приложениесине кирирге, телефонну ишлемезча этерге боллукъдула. «Drama RAT» деген программа кёбюсюне мессенджерледе, СМС-леде, электрон почталада джайылады. Аманлыкъчыла, адамла ол заранлы программаны телефонларына джаздырыр ючюн, аны кючюнден «ChatGPT» неда «Яндекс. Музыка» сервисле бла, джангы VPN бла хакъсыз хайырланыргъа, «Minecraft» деген компьютер оюннга модла салыргъа боллукъду дегенча «таблыкъла» теджейдиле. Аны бла бирге «Декларация», «Счёт на оплату» деген атлары болгъан файлланы да джибередиле.
Файл ачылгъандан сора приложениеде «обновить» деген сёз чыгъады. Анга басылса, телефоннга заранлы программа тюшеди. Ызы бла «Служба специальных возможностей» дегеннге эркинлик берирге теджеледи. Алай бла, заранлы программагъа экранда болгъан затланы кёрюрге, паролланы билирге эркинлик бериледи. Андан сора приложение PIN-код салыргъа теджейди. Алай бла, аманлыкъчы смартфонну иеси джукъ этелмезча тыйгъычла салады.
«Drama RAT» деген программаны тюз мадарла бла ачыкълагъан къыйынды. Аны бла устала кюрешедиле.
Багъалы джамагъат! Телефонугъузгъа келген ышаннгысыз ссылкалагъа, файллагъа кириб айланмагъыз. Аланы юслери бла аманлыкъчыла сизни энчи информациягъыз бла хайырланыб, ачхагъызны иелерге, сизни атыгъыз бла кредит алыргъа, башха адамладан ачха тилерге дагъыда законнга къаршчы башха ишле этерге боллукъдула. Сакъ болугъуз!

КъЧР-ни МВД-ны пресс-къуллугъу.