Бу кюнледе Черкесскени «Джашил айрымкан» деген солуу эмда джарыкълыкъ паркында, Сабийлени джакълауну кюнюне аталыб, къууанч джыйылыу болгъанды.
Ол «Доступная среда» кърал программаны тамалында «Мой особенный ребёнок» деген ат бла сабий фестивалны джоругъунда ётгенди. Ол быйыл 5-чи кере бардырылгъаны себебли, фестивалны 5-джыллыкъ юбилейи да белгилене эди, кесини да программасы бай эди. Фестиваль Эресейни сабий фондуну КъЧР-де бёлюмюню, «Наш Теремок» сабий журналны эмда КъЧР-ни Маданият министерствосуну болушлукълары бла къуралгъан эди.
Алгъы бурун, сабий фестивалны юсюнден МОСУ-ну «Синергия» колледжини студентлери хазырлагъан видеороликлени кёргюздюле. Къууанч джыйылыуну ачханларындан сора, сёз КъЧР-ни маданият министри Агирбов Зурабха берилди. Ол фестивалгъа къошулгъанланы, аланы чемерликлерине къараргъа келген сабийлени байрам бла алгъышлаб, алагъа, аланы аталарына-аналарына эмда сабий учреждениеледе сабийлени ёсдюрюуге къыйынларын салыб кюрешген усталагъа саулукъ-эсенлик теджеди.
Ызы бла Адыге-Хабль райондан «Звёздочка» сабий тепсеучю къауум, «Мы» деген джарыкъ джырны джырлай, тепседиле. Бу тукъум къууанч джыйылыулагъа волонтёр Байрамукъланы Руслан хаман эс бёлгенлей, ауругъан, кемизли фахмулу сабийлени да келтирирге болушханлай турады. Бу джол да ол бир джанында къалмагъанды. Джыйылгъан миллетни арасында аны чакъырыб сахнагъа чыгъардыла. Ол байрамны былай джарыкъ бардырыргъа болушлукъ этгенлеге, программаны къурагъанлагъа, келген къонакълагъа да, сабийлени джюреклерин къууандыргъанлары ючюн, бюсюреу этиб, разылыгъын билдирди.
Андан сора Черкесскеде 1-чи школ-интернатны сохталары Бытдаланы Лейла бла Шебзухова Мадина да тиллери сёлешмегенле, къулакълары эшитмегенле ангы-
ларча кемизли сабийлеге джораланнган «Твори добро» деген джырны джырладыла. Черкесск шахарда Кипкеланы Зухра башчылыкъ этген «Точка развития 09» деген сабий аралыкъны сохталары да, «Весёлая казачка» атлы джарыкъ тепсеуню кёргюзюб, джыйылгъан миллетни къууандырдыла. Бизни республикадан тышындан да келген къонакъла бар эдиле фестивалда. Аланы арасында Ставрополдан «Лира» дуэт – эгешчикле Хабичланы Салима бла Самира – «Наш Кавказ» деген джырны тамам ариу джырладыла. Фестивалны программасында КъЧР-де джашагъан халкъланы миллет тартыулары да болгъаны себебли, Ючкекенден Байчораланы Мариям башчылыкъ этген «Джулдуз» атлы музыкалы инструментли ансамбль къарачай халкъ тартыуланы тамам уста согъуб, алайгъа келгенлени джюреклерине къууанч салды.
Фестивалны программасына кёре, фахмулу сабийле кеслерини чемерликлерин талай тюрлю номинацияда кёргюздюле. Фестивалгъа къошулгъан сабийлеге тюрлю-тюрлю саугъала да бердиле, бу джарыкъ байрам кёб джылланы эслеринде сакъланырлай суратха да тюшдюле.
Къууанч джыйылыугъа келгенле барысы да фестивалны бу тукъум таб джарашдыргъанларына, бай, сейирлик къурагъанларына бюсюреусыпас этиб, джюрек разылыкъларын билдирдиле.
(БИЗНИ КОРР.).
