Бу кюнледе республикан аралыкъда джашагъан 19 джыл болгъан къыз Эресейни МВД-ны Черкесск шахарда бёлюмюне барыб, кесин хыйлачылагъа алдатханыны юсюнден тарыкъгъанды.

Ол айтханнга кёре, анга биреулен къонгурау къагъыб: «Мен почтаны къуллукъчусума. Сизни атыгъызгъа заказной письмо келгенди, аны бла байламлы телефонугъузгъа келген кодну айтыргъа керексиз», – дегенди. Къыз ол айтханча этгенди. Андан сора анга башха хыйлачы къонгурау къакъгъанды. Ол: «Мен джорукъ сакълагъан органны къуллукъчусума. Сизге терслеу иш ачылыргъа боллукъду. Башыгъызны алыр ючюн, мен айтхан счётха ачха иерге керексиз», – деб, къызны къоркъутуб, 600 минг сом ашыртханды.
Бюгюнлюкде полицияны къуллукъчулары ол хыйлачыланы ачыкълау бла кюрешедиле.
Зеленчук станседе джашагъан 69 джыл болгъан тиширыу да хыйлачыладан джарсыгъанды. Тиширыу полициячылагъа айтхандан, кеси танымагъан биреулен айтханны этиб, такси бла Кропоткин шахаргъа барыб, 1,4 мелиуан сом ачхасы бла пакетни биреуге бериб кетгенди. Талай кюнден тиширыу, хыйлачыла айтханны эте, почта бёлюмге барыб, ала айтхан счётлагъа энтда 500 минг сом ашыргъанды.
Бу ишни юсю бла да полицияны къуллукъчулары тинтиуле бардырадыла.
Багъалы джамагъат! Телефонугъузгъа келген кодну биреуге айтмагъыз. Кърал власть органланы, бирлешликлени, энчи компанияланы келечилери мессенджерледе, социал сетледе адамла бла байламлылыкъгъа чыкъмайдыла. Алай къуру да хыйлачыла этедиле.

КъЧР-ни МВД-ны пресс-къуллугъу.