Бу кюнледе Къарачай-Черкесияда Къарачайны джангырыу кюнюне аталгъан фестиваль бардырылгъанды. Аны кёзюуюнде КъЧР-ни Спорт бла физкультураны хакъындан министерствосу панкратион бла кюрешген джаш спортчуланы араларында эришиуле бардыргъанды.

Ол эришиулеге 300-ге джууукъ спортчу къошулгъанды. Ала, джылларына эмда ауурлукъларына кёре къауумлагъа юлешиниб, къарыуларын сынагъандыла.
Панкратионнга усталыкъларын кёргюзгенлени араларында Сары-Тюз элде «Пелиуан» деген спорт клубха джюрюген сабийле бла джаш адамла да болгъандыла. Ала, хазна къалмай бары да, ёчлю орунланы алгъандыла.
Алайды да, кеслерини ауурлукъларында Лепшокъланы Шамиль, Хубийланы Абдуллах, Бостанланы Мусса, Бостанланы Мирлан, Бостанланы Дамир, Дотдуланы Абдуллах, Гочияланы Алибек, Текеланы Аслан, Ёзденланы Рашид 1-чи орунланы алгъандыла.
Шунгарланы Амир, Кийикланы Мурат, Борлакъланы Мухаммад, Эдиланы Аслан, Дотдайланы Алибек, Хубийланы Адам, Акъбайланы Расул, Борлакъланы Имран, Семенланы Рамин, Эриккенланы Алан, Амучуланы Кямран 2-чи орунлагъа чыкъгъандыла.
Джабаланы Казбек а панкратионнга усталыгъын эки кере да танытханды. Ол кесини ауурлугъунда 1-чи орунну, кесинден ауурланы къауумунда да 2-чи орунну иелегенди.
Джетишимли спортчуланы панкратионну амалларына махтаулу тренер Гогуйланы Мурат юретгенди.

(БИЗНИ КОРР.).