2026-чы джыл къралны регионларында бардырылыучу «Вкусы России» деген гастроном фестиваль джангы дараджагъа чыкъгъанды – быйыл фестиваль Эресейни эки субъектинде ётерикди.

Биринчи «Вкусы России» фестиваль никкол (июнь) айны 12-ден 13-не дери Смоленск шахарда бардырыллыкъды. Фестивалны экинчи площадкасы алкъын белгиленмегенди.
Фестивалны РФ-ны Эл мюлк министерствосу къурагъанды. Анга Эресейни джер-джеринден фермерле, элледе азыкъ эмда эл мюлк продукция чыгъаргъан гитче предприятиеле къошулургъа боллукъдула.
«Вкусы России» фестивалны тамалында Смоленск шахарда кеслерини продукцияларын теджерге излегенле никкол (июнь) айны 2-не дери вкусыроссииврегионах.рф. сайтда заявка берирге керекдиле.
Озгъан джыл фестивалгъа къралны 40 регионундан фермерле къошулгъан эдиле. Фестивалда 85 минг адам продукцияны 3 000 тюрлюсю бла шагъырей болгъандыла.
Быйыл къыркъар (август) айны 13-ден 23-не дери «Вкусы России» фестиваль къралны ара шахарында ВДНХ-да да бардырыллыкъды.
Фестивалда продукцияларын теджегенле, кеслерине джангы иш нёгерле табаргъа, федерал дараджада регионал брендлерин кёргюзюб, уллу проектлеге къошулургъа боллукъдула.
Фестивалгъа къараргъа келгенле Эресейни джер-джеринде этилген продукцияны татыуун кёрюр, мюлклени келечилери бла ушакъ этер мадар да табарыкъдыла. Аны бла бирге къонакълагъа мастер-классла къураллыкъдыла, къралны белгили артистлери концерт кёргюзюрюкдюле.

САЛПАГЪАРЛАНЫ Умар.