Хоншубуз къызгъанч Джаммот багъалы импорт машина алгъаныны хапары тёгерекге дженгил джайылды. Хоншула, адетдеча, джыйылыб бардыкъ, кёб алгъыш этдик, сейирсиндик – ол къызгъанч адам бу багъалы машинагъа къалай джоюлгъанды деб.

Арадан эки кюн кетгенлей, къарасакъ, подъездни аллы полициядан толуб тура! Ярабин, кимге не болгъан болур деб, эшикге чыкъсакъ: Джаммотну джангы машинасын урлагъандыла гудучула деген хапарны эшитдик. Джаммотха тюбеб сорсакъ:
– Кесигиз билесиз, мен капекни-капекге джалгъаб, талай заманны кюрешиб, джыйыб алгъан эдим машинаны (заманында ол складны хурджуннга ургъаныны юсюнден хапарны уа ким да биледи).
– Алгъан кюнюмю экинчи кюнюнде огъуна танышла да бир кёрюрле деб, хоншу супермаркетге дери барыб, ары-бериле да алыб келейим, деб кесим джюрютюб баргъан эдим. Аллыгъымы да алыб юйге келдим, бир кесек да солуб, машиначыгъыма тансыкъ болуб, энтда да бир кере къараргъа балконнга чыкъдым. Къарасанг аллайгъа къара, салгъан джеримде машиначыгъым джокъ. Кюйдюм-бишдим, фатарымда ары-бери чабдым, башым бек кючлю ауруб къыйнады. Хайырлана да башламагъанлайыма машиначыгъым аманлыкъчылагъа азыкъ болуб къалгъанына бек уллу къыйналдым. Энди полицияны чакъыргъанма да, ала кюрешедиле машина ызланы ёлчелеб-зат этиб, арты къалай боллукъ эсе да билмейме, табаллыкъ болмазла, аллай багъалы машинаны аманлыкъчыла эрлай табылмазча джерге думп этген болурла.
– Да, Аллах болушсун. Бусагъатда машина урланнган да джокъну орнундады. Къыйналма аллай бир, кесинги сакъларгъа кюреш, полицияны кючю уллуду, табыб къоярла, – деб, Джаммотха кёл этиб, чачылдыкъ, ол да полициягъа заявление джазаргъа ала бла бирге машиналарына миниб кетди…
Арадан кёб заман да кетгинчи къууанч хапар эшитдик Джаммот машинасын кеси джюрютюб юйге келгенди деб. Ол, а былай болгъанды: Джаммот супермаркетден чыгъыб юйге юреннгенича джаяулай кетиб къалгъанды, машинаны да тюкенни аллында къоюб. Полицияда заявление да джазыб, джаяулай келе турса, машинасы тюкенни аллында сиреледи…
Кемсиз къызгъанчлыкъ адамны эсине ковидден эсе кёб заран салады деб, тюз айта болурла врачла...

Боташланы Руслан.
Къарачай шахар.