Табигъатны хазнасы Уллу Аллахдан саугъа болуб адамлагъа берилгенди.
Ол инсанны джашау байлыгъына юлюш къошхан, аламат джомакъ уягъа ушайды. Баргъан суула да алайдыла. Кюмюш бурчакъла чачхан аланы татлы, зынгырдауукъ ауазлары адамлагъа игилик келтиредиле. Уллу Муруджу суу да аллай сейирлик къурайды.

Бу аламат суу, толкъунлары бир-бирин сюрюб ойнай, кёмюк этиб къайнай, кюмюш къучагъын ачыб, адамланы кесине чакъыра, аланы ашхы сезимлерин къозгъайды.
Суу бир джерде къызыу бара, бир джерде акъыртын бола, къая ташланы джуууб, таууш эте, энгишге къуюлады. Кём-кёк сууу асыры тазадан, тюбюнде хар ташчыгъы кёрюнеди. Алимле айтхандан, ол Эресейде, Европада да эм таза суугъа саналады. Аны къурамында кюмюш барды, кеси да мийик тауланы бузларындан саркъб келеди. Бу асыл суу джылны къайсы бир заманында да сууукълай турады. Былайыны къалын чегетлери аламат хауа къурайдыла. Къыш аны асламысын терен къар басады, джай ол толусу бла да эриб къалалмайды. Ууакъ кёкенлени, гокка хансланы араларында къар кесекле кёрюннгенлей турадыла.
Бери келген къонакъла, туристле, былайда солуб, саулукъларын бегите, биргелерине сауутла бла суу алыб кетедиле.

Лепшокъланы Хусеин.