Къарачай-Черкесияда джашагъан багъалы ахлуларыбыз! Барыгъызны да  кърал байрам бла - Ата джуртну Къоруулаучуну кюню бла - таза джюрекден исси алгъышлайбыз.
Бу байрам патриотизмни, эркишиликни, Ата джуртну эмда туугъан отджагъаны къорууларгъа хазыр турууну байрамыды. Джуртну Къоруулаучусу болуу  хар эркишини  баш джашау джоругъуду. Алай болса да бюгюнлюкде аскер къуллукъну тиширыула да эркишиле бла тенгликде бардырадыла.
Алайды да,  биз кеслерини аскер борчларын махтау бла толтургъанланы, Россияны джашау излемлерин джакълагъанланы, джигитликни юлгюсю болуб тургъанланы барын бу сыйлы байрам бла алгъышлайбыз.

Уллу Ата джурт къазауатда джигитлеча сермешген багъалы ветеранларыбыз бизге ёмюрлюкге юлгю болгъанлай турлукъдула. Аланы кючлери бла бюгюн биз рахат, азат, кючлю Россияда джашайбыз. Ол ветеранларыбызны джигитликлери бизни Ата джуртубузну тарихине аланы къанлары бла джазылыб сингнгенди.
Айхай да, биз аскерчилерибизни-интернационалистлерибизни, Россияны Сауутлу Кючлерини ветеранларыны, къралыбызны ичинде да, тышында да аны рахатлыгъын, къоркъуусузлугъун сакълагъан аскерчилерибизни атларын уллу ёхтемлик бла эмда джюрек толу  разылыкъ  бла эсгериб, алагъа сый беребиз.
Ата джуртну багъалы къоруулаучулары, сизни барыгъызгъа да таза джюрекден кючлю саулукъ, узакъ ёмюр, насыб, ашхылыкъла, неден да алгъа уа сизге да, эт адамларыгъызгъа да мамырлыкъ, игиликле теджейбиз!