КъЧР-ни «Спутник» аралыгъында «Биринчи усталыкъ» деген проектге къошулгъанлагъа къагъытларын бергендиле. Кеслерини биринчи усталыкъ документлерин 239 окъуучу алгъанды.

– Багъалы сабийле, сиз бюгюн кесигизни биринчи усталыкъ къагъытыгъызны аласыз. Сиз аны кесигизни къыйыныгъыз бла аласыз. Джууаблылыкъны сезе билгенигизни, ишден артха турмагъаныгъызны да танытхансыз. Биринчи атламыгъыз огъур болсун, джетишимлеге джол тутсун, – дегенди КъЧР-ни окъуу бла илму министрини орунбасары Шаманланы Шамиль.
«Биринчи усталыкъ» деген проект бизни республикада 2014-чю джыл ишлеб тебрегенди. Аны баш мураты школда окъуй тургъан сабийлеге алагъа джараулу усталыкъ сайларгъа болушууду. Сабийлеге окъуу организациялада сынамлы устазла эмда устала дерс бередиле, иш сынам алдырадыла, юретиу-ангылатыу иш бардырадыла.
2024-чю джыл бу проектге 60 сохта къошулгъанды, 2025-чи джыл – 130 адам. Быйыл усталыкъ къагъытларын алгъанланы саны 239 сабийге джетгенди.
КъЧР-ни Окъуу бла илму министерствосунда билдиргенлерине кёре, сабийле бу проектни бек джаратханларын танытхандыла, ишден хапарлы болургъа тырмашханланы саны ёседи.
Проектни джашаугъа сингдириуде усталыкъ билим берген организацияланы юлюшлерин айырыб чертерге тыйыншлыды. Къагъытларын алгъан сохтала устазлагъа, усталагъа да разылыкъларын да билдиргендиле.
Джыйылыуну аягъында суратлау-чемерлик коллективле концерт кёргюзгендиле.