Зеленчук районда СВО-гъа къошулгъанланы юйдегилери бла тюбешиу болгъанды.

КъЧР-ни Башчысыны аманаты бла бардырылгъан джыйылыугъа КъЧР-ни урунуу бла социал ёсюмюню министрини орунбасары Хубийланы Фатима, КъЧР-ни Халкъ Джыйылыууну депутаты Юлия Капалкина, республикада Сабийни эркинликлерини хакъындан уполномочённый Алакъайланы Мария, Ата джуртну къоруулагъан аскерчилени юйдегилерини комитетини регионал бёлюмюню тамадасы Аида Анушко, республиканы санагъат министерстволары бла ведомстволарыны эмда районну администрациясыны келечилери, эллени башчылары къошулгъандыла.
Тюбешиуню кёзюуюнде бизни республикада аскер къаугъада болгъанла бла аланы юйдегилерине къаллай болушлукъ этилгенинден хапар айтылгъанды. Бютюн да уллу эс медицина эмда реабилитацион джаны бла не этилгенине бёлюннгенди. Юристледен къаллай болушлукъ табаргъа боллугъуну хакъындан да информация берилгенди. Ол юйдегилеге юй ишлерге джер бериуню джоругъундан да сёз баргъанды.
Хубийланы Фатима айтханнга кёре, республикада джашагъан адамланы тилеклери эмда оюмлары бла этилген болушлукъну тизими ёсгенден ёсюб барады.
– СВО-ну ветеранларындан эмда юйдегилеринден тюшген тилек къагъытлагъа дженгил къарайбыз. КъЧР-ни Правительствосуну болушлугъу бла аланы излемлерин толтурургъа кюрешебиз. КъЧР-ни Башчысы Темрезланы Рашид бу ишге энчи контроллукъ этеди, – деб чертгенди Зеленчук районда депутатланы советини председателини орунбасары Пётр Вильхов.