Аскер къаугъагъа къошулгъан джашлагъа эмда госпиталда кеслерин бакъдыргъан джигитлеге кёзюулю гуманитар болушлукъ ашырылгъанды. Бу джол алагъа «Селена» предприятиеде ишлегенле 40-дан аслам орун керек джибергендиле.

– Компания таймаздан аскер госпиталлагъа эмда аскер къаугъада болгъанлагъа болушлукъ табдыргъанлай турады. Сёзден, СВО башланнганлы бери 210-дан аслам тёшек, 240-дан артыкъ орун керек, 342 джастыкъ эмда 151-ден аслам тёшек тыш бла джылы джууургъан джибергенди.
Быллай болушлукъ, айхай да, керекди, аны бла бирге Ата джуртларын сакълагъанлагъа къайгъырыуду, аланы кёллерин кёлтюрюудю, разылыкъ билдириудю, – деб чертгендиле Джёгетей Аягъы районну администрациясында.
Былайда энтда къошаргъа тыйыншлыды. Айтыргъа, «Хорлам» деген спорт школгъа джюрюгенле аскерчилеге гуманитар джюк джыйышдыргъандыла. Джюкню къурамына беш тонна ичер суу, кёб заманны аман болмазлыкъ ашарыкъ эмда азыкъ, аскерчилеге амалсыз керекли затла, адамны, техниканы да джашыргъан сетле.
Джюкню Луганск бла Донецк Халкъ Республикалагъа табдыргъандыла.
Джиберилген болушлукъ КъЧР-ни Башчысы Темрезланы Рашидни аманаты бла къуралгъан штабны юсю бла барады.