Хычаман (май) айны 21-де Къарачай-Черкесияны джер-джеринде Кавказ къазауат бошалгъанлы 162 джыл озгъаны бла байламлы эсгериу ишле бардырылдыла.
Республикан дараджада бушуу митинг Черкесскени Гутякулов атлы орамында, Кавказ къазауатда ёлгенлеге аталгъан эсгертмени къатында, болду.

Алайгъа КъЧР-ни Халкъ Джыйылыууну (Парламентини) Председатели Александр Иванов, КъЧР-ни Правительствосуну Председатели Мурат Аргунов, КъЧР-ни Башчысыны эмда Правительствосуну Администрациясыны тамадасы Мурат Озов, депутатла, кърал къуллукъчула, джамагъат эмда дин бирлешликлени келечилери, дагъыда башхала джыйылгъан эдиле.
Бушуу митингде Кавказ къазауатда ёлгенлеге КъЧР-ни муфтийи Эриккенланы Мухаммат хаджи бла Покров клисаны бабасы, протоиерей Александр Нартов дууа этдирдиле.
Андан сора КъЧР-ни Халкъ Джыйылыууну (Парламентини) Председатели Александр Иванов сёлешди.

Кавказ къазауатда ачыгъанланы юслеринден айтхан заманда черкеслилени, ногъайлыланы, абазалыланы, башха тау халкъланы келечилерин эсгергенибизни, алай болса да, ол къазауат, къуру таулулагъа тюл, хоншулары бла шохлукъ джюрютгенлери амалтын къаугъагъа амалсыздан къатышыргъа керек болгъан оруслулагъа, къазакълылагъа башха миллетлеге да къыйынлыкъ келтиргенин чертди ол.
Александр Иванов сёзюн: «Мындан ары аллай къыйынлыкъ бир миллет да сынамасын», – деб бошагъанды.
Адетдеча, сагъат 12 бола бушуу митингге къошулгъанла, Кавказ къазауатда ёлгенлени эсгере, бир такъыйкъаны шош болдула.
Аны ызындан «Адыгэ Хасэ – Черкесский Парламент» деген джамагъат бирлешликни тамадасы Алий Асланов КъЧР-ни Халкъ Джыйылыууну (Парламентини) Саулукъ сакълау бла социал политика бардырыуну хакъындан комитетини тамадасы, «Къарачай – алан халкъ» деген джамагъат бирлешликни тамадасы Хубийланы Хасан, «Абаза» деген джамагъат бирлешликни кенгешини тамадасы Умар Кончев, КъЧР-ни Халкъ Джыйылыууну (Парламентини) Илмуну, билим бериуню, маданиятны, спортну, джаш тёлю ишлени, туризмни хакъындан комитетини председатели, «Русь» деген джамагъат бирлешликни президиумуну тамадасы Алексей Ганшин дагъыда башхала сёлешдиле. Ала бары да джыйылгъанланы, тарих бетлени, Кавказ къазауатда ёлгенлени эсгере, келишиулю джашаргъа чакъырдыла.
Эресейни Президенти Владимир Путин къралыбызны кючю, къадары, сейирлиги да кёб тюрлю миллети биригиб джашагъанында болгъанын айтыучусун сагъыныб, ол махтауубузну мындан ары да тас этмейик дедиле.
Алайгъа баргъанла эсгертмени къатына гокка хансла салыб чачылдыла.