Къарачай-Черкесияны Башчысы Темрезланы Рашидни аманаты бла КъЧР-ни Правительствосуну Председатели Мурат Аргунов, талай кюнню джангурла джаууб, республиканы бир къауум джерлеринде джолланы уллу ырхыла зыгъырдан толтургъанлары бла байламлы кенгеш бардыргъанды.
Кенгешге республиканы Правительствосуну къуллукъучулары, федерал ведомстволаны КъЧР-де бёлюмлерини келечилери, шахарла бла районланы башчылары къошулгъандыла.
Республиканы Правительствосу регионда хауа болумгъа уллу эс бёлгенлей турады. Гидрология постла билдиргеннге кёре, КъЧР-де суула кёлтюрюлгендиле, алай а къоркъуулу дараджагъа джетмегендиле. КъЧР-ни Башчысы Темрезланы Рашидни буйругъу бла республиканы къоркъуулу болумлагъа къарагъан къуллукълары керек болса болушлукъ этерге хазыр турадыла.
Темрезланы Рашид регионда болум аманнга кетмезча эмда суу къобханы болса этилирге керек ишлени белгилегенди:
– муниципалитетлени башчылары къошулгъан мониторинг къауумла къураргъа;
– Граждан къоркъуусузлукъ бла къоркъуулу болумланы хакъындан управлениени тамалында информацион аралыкъ къураб, кюн сайын бардырылгъан мониторингге къаллай бир джангур джаугъаныны, сууланы кёлюрюлгенлери бла къалгъанларыны юсюнден информацияны, 13 гидрология постну билдириулерин къошаргъа;
– суу джагъаланы бегитген бедженлени барын да энчи контролгъа алыргъа;
– КъЧР-ни Транспорт министерствосу бла джоллагъа къарагъан къуллукълагъа джол инфраструктураны заран джетерге боллукъ джерлерин ачыкъларгъа;
– КъЧР-ни Къурулуш министерсвосу бла муниципалитетлеге Къобан, Уллу Зеленчук суулагъа джууукъда орналгъа ЖКХ предприятиелени болумларын тинтерге;
– суула кёлтюрюлюб, сууну тыйылгъаныны эмда аны кирлилигини юсюнден джамагъатха заманында билдирирге;
– Джёгетей Аягъы, Абаза, Ногъай районлада, Черкесск шахарда Къобан сууну джагъаларын тинтерге;
– регионда джашагъанланы, артыкъсыз да сабийлени къоркъуусузлукъларын баджарыргъа.
Башында айтылгъан буйрукъланы толтурууну республиканы Башчысы энчи контролгъа алгъанды.
Темрезланы Рашид республикада джашагъанланы МЧС-ни, джергили администрацияланы официал билдириулерине эс бёлюрге чакъыргъанды.
«Билдириулени сансыз этмегиз, суу джагъаланы, тау этекледе къоркъуулу джерлени къатларына бармагъыз. Кесигизни, джууукъларыгъызны да сакълагъыз», – деб джазгъанды КъЧР-ни Башчысы Темрезланы Рашид МАХ мессенджерде.
