Хычаман (май) айны 20-да КъЧР-ни Башчысы Темрезланы Рашид Москвада Федерал джол агентствону тамадасы Роман Новиков бла тюбешгенди.

Тюбешиуге Росавтодорну къуллукъчулары, КъЧР-ни Правительствосуну Председателини орунбасары Орусланы Марат да къошулгъандыла. Ала Къарачай-Черкесияда джол инфраструктураны айнытыуну юсюнден сёлешгендиле.
«Джолланы игилендириу, джангы джолла бла кёпюрле ишлеу республиканы социал-экономика, туризм, промышленность санагъатларыны ёсюмюню баш хыйсабларыдыла», – дегенди Темрезланы Рашид.
Тюбешиуде «Инфраструктура для жизни» деген миллет проектни тамалында джолланы къурулушлары эмда аланы джангыртыу бла байламлы проектлени толтурууну юсюнден сёз баргъанды. Ол миллет проектге кёре, быйыл КъЧР-де юч кёпюр бла регионал эмда муниципал джолланы 38 километри да джангыртыллыкъдыла.
Джолда джюрюуню къоркъуусузлугъуна да эс бёлюннгенди. Артыкъсыз да, чарпыуланы азайтыу, къоркъуусузлукъну баджарыу бла байламлы мадарла сюзюлгендиле. Аны бла бирге, туристлени эмда улоуну саны ёсгенин эсге ала, джолланы кенгертиуню юсюнден да сёлешиннгенди. «Доммай», «Архыз» курортлагъа, джангы ишлениб башланнган «Архыз» аэропортха баргъан джолланы игилендириуге уллу эс бёлюннгенди.
«Регионну джол инфраструктурасын айнытыуну хакъындан этиллик ишлени белгилегенбиз. Роман Новиковну башчылыгъы бла Росавтодорда ишлегенлени барына да, республиканы джол-транспорт санагъатын айнытыргъа болушлукъ этиб тургъанлары ючюн, разылыгъымы билдиреме. Мындан ары да къысха байламлылыкъда ишлерге муратлыбыз. Къарачай-Черкесиягъа ёсюм алдырыргъа джарагъан джангы, деменгили эмда къоркъуусуз джолла ишлетиу бизни баш борчубузду», – дегенди КъЧР-ни Башчысы.