Невинномысск шахарда Эресейни махтаулу тренери Боташланы Татьянаны, Юрийни къызын, эсгериуге аталыб, джюзюуден край дараджалы эришиуле болгъандыла.
Аны ачыугъа джыйылгъанланы арасында Невинномысск шахарны Думасыны тамадасы Александр Медяник, администрациясыны окъуу управлениесини тамадасы Анжелика Пушкарская, администрациясыны Джаш тёлю политикадан, физкультура бла спортдан комитетини тамадасы Наталия Ярош, Боташланы Татьянаны джашы Боташланы Руслан, эришиулени спонсору, Эресей Федерацияны спортуну устасы Андрей Долгов дагъыда башхала болгъандыла.
Ол эришиулеге Ставрополь крайдан, Къыбыла Тегей, Къарачай-Черкес республикаладан 200-ден аслам белгили спортчу къошулгъанды.
Боташланы Татьяна «Рекорд» деген спорт школда 30 джылдан аслам заманны ишлегенди. Анга, устазлыкъ усталыгъы эмда джюзюуню ёсюмюне къошхан тыйыншлы юлюшю ючюн, «Эресейни махтаулу тренери» деген сыйлы ат аталгъанды. Аны «За заслуги перед Ставропольским краем» деген медаль бла «Эресей Федерацияны окъуууну сыйлы къуллукъчусу» деген белги бла саугъалагъандыла. Ол кесини джашау джолунда кёб тюрлю онглу спортчуну хазырлагъанды. Аланы арасында Эресейни спортуну махтаулу устасы, спортну халкъла арасы класслы устасы, Олимпия оюнлада ёчлю орунну алгъан Роман Ивановский, халкъла арасы класслы, юниорланы арасында Европаны биринчилигинде эки кере экинчи орунну алгъан Артем Бабихин, спортну халкъла арасы класслы устасы, къызланы арасында Европаны биринчилигинде экинчи орунну алгъан Марина Росланкина дагъыда башхала бардыла.
Боташланы Татьяна СССР бла Эресейни спортуну 7 устасын, спортну устасына 38 кандидатны, биринчи разрядлы 70-ден аслам спортчуну хазырлагъанды. Аллай мийик джетишим таулу къызны атын махтау бла кенгнге айтдыргъанды.
Татьянаны ишин ол юретген, школда ишлеген спортчула Евгения Игнатенко, Елена Матюшенко, Мария Моисеенко бардырадыла.
Невинномысскени командасы ол эришиулеге къошулгъан 54 спортчудан къуралгъанды, ала 28 медаль алгъандыла.
200 метрге сырт бла джюзюуден Анатолий Бодун, баттерфляйдан 50 метрге Ярослав Гречкин, 200 метрге Ольга Левченко, 50 метрге Анна Мирошниченко дагъыда башхала алтын медалла алгъандыла.
200 метрге сырт бла джюзюуден Елисей Бабадеев, 100 метрге баттерфляйдан Ольга Левченко, 100 метрге эркин джюзюуден Анастасия Хижнякова дагъыда башхала кюмюш медалла алгъандыла.
50 метрге эркин джюзюуден Георгий Валько бла Анна Мирошниченко, 200 метрге сырт бла джюзюуден Илья Вишневский, Даниил Школьный дагъыда башхала джез медалла алгъандыла.
Хорлагъанла бла ёчлю орунланы алгъанланы тренерле-устазла Евгения Игнатенко, Андрей Волков, Анастасия Волкова, Татьяна Миронова, Ольга Миронова юретгендиле.
Биз спортчуланы ашхы джетишимлери бла алыгъышлай, алагъа джангы хорламла теджейбиз.
Лепшокъланы Хусеин.
