Къарачайны белгили, атларын махтау бла айтдыргъан джигер, джигит спортчулары кёбдюле. Ала спортну къайсы бир тюрлюсюнден да мийик джетишимлени къатлагъанлай турадыла. Мен хапарын айтыргъа излеген Салпагъарланы Умарны джашы Магомет да аланы бириди.

Халкъыбызны атын кенгнге белгили этген ол джигит спортчубуз дженгил атлетикадан 23 джылгъа дери юниорланы арасында, Эресей дараджада, Низамутдин Александрны ёчюне аталыб бардырылгъан эришиулеге къошулуб, экинчи орунну алгъанды.
Андан сора джигит джашыбыз башил (январь) айны 24-де – 25-де Ставрополда дженгил атлетикадан, Шимал Кавказ федерал округну биринчилигине аталыб, Эресей дараджада къуралгъан аллай эришиуледе ядро бла диск атыудан хорлаб, алтын медаллагъа ие болгъанды. Ол алайда фахму, билим, тирилик кючюн таныта, кесине, халкъыбызгъа да махтау келтиргенди. Ол эришиулеге уллу къралыбызны 31 регионундан, Калининграддан Владивостокга дери, 278 спортчу къошулгъанды. Ала, эркишилик, джигитлик, тёзюмлюлюк таныта, хорламгъа ие болур джанындан кючлерин аямай кюрешгендиле.
Джердешибизни спортха атасы Салпагъарланы Умар юретгенди.
Биз Магометни, къууанч келтирген аллай ашхы джетишими бла алгъышлай, анга мындан ары да джангы, мийик дараджалы джетишимле теджейбиз.

Узеирланы Хусей.