Бизни къралда кемизли сабийлени саулукъларын багъыугъа, кёллерин кёлтюрюуге, алагъа билим бериуге тыйыншлы эс бёлюнеди. Эресейни регионларында аллай сабийлеге джораланнган реабилитацион аралыкъла, коррекцион школла бардыла. Алада сабийле, окъуу-билим алгъандан сора да, тюрлю-тюрлю кружоклагъа джюрюб, джарыкълыкъ ишлеге къошулуб, кеслерини фахмуларын танытадыла.

Черкесск шахарда 1-чи къауумлу (вид) республикан коррекцион школда-интернатда «Мы слышим сердцем» деген театр-студия барды. Ары джюрюген сабийле,
джырда, тепсеуде, сахна оюнлада фахмуларын танытыб, устазладан, ата-аналадан бюсюреу табханлай турадыла.
Кёб болмай фахмулу сабийлени ачыкълагъан эмда билимлерин ёсдюрген «Спутник» аралыкъны уллу залында «Мы слышим сердцем» деген театр-студия, Эресейни халкъларыны бирлигини джылына атаб, «Дружба народов – единство России» деген ат бла отчёт концерт бардырды.
Залгъа кёб адам джыйылгъан эди – депутатла, джамагъат бирлешликлени келечилери, СВО-ну ветеранлары, коррекцион школну устазлары, ата-анала дагъыда башхала.
Концертни аллы бла коррекцион школну-интернатны директору Гербекланы Зулиха джыйылгъанлагъа хошкелди айтды.
– Бизни отчёт концертибиз Юйдегини халкъла арасы кюнюнде бардырылгъаны аны андан да магъаналы этеди. Бизге бу залны бергени ючюн, «Спутник» аралыкъны директору Къоджакъланы Джульеттагъа разылыгъымы билдиреме. Фахмулу устазларыбыз бла сабийлерибиз Эресейни халкъларыны бирлигине аталгъан концерт хазырлагъандыла. Сиз барыгъыз да анга сюйюб къарарыкъсыз деб ышанама, – деди Гербекланы Зулиха.
Республикада устазланы билимлерин ёсдюрген институтну юретиуню, психологияны, инклюзив эмда къошакъ билим бериуню хакъындан кафедрасыны тамадасы Гочияланы Танзиля да концертге сюйюб келгенини юсюнден айтды.
– Бюгюн республикабызны эм фахмулу сабийлери кеслерини чемерликлерин кёргюзедиле. Коррекцион школда кемизли сабийлеге тыйыншлы билим берген бла къалмай, аланы фахмуларын ачыкълаугъа уллу эс бёлюннгенин чертерге излейме. Аны ючюн школну директору Гербекланы Зулихагъа, устазлагъа уллу бюсюреу этеме. Биз тюрлю-тюрлю миллетлени келечилери болсакъ да, бир-бирибиз бла шохлукъ джюрютебиз, керек кюнде биригиуюбюзню танытабыз. Сабийле бла устазла къурагъан бюгюннгю концерт да анга шагъатлыкъ этеди, – деди Гочияланы Танзиля.
Концерт сахна оюн халда къуралгъан эди. Аны сюжетине кёре, шохлукъда, бирикмекликде джашагъан адамлагъа бир аманлыкъчы келиб, аланы тынчлыкъларын, рахатлыкъларын «урлаб» кетгенди. Аны амалтын, адамланы арасында дауурла башланнгандыла. Аланы ызына шох этер мурат бла Батар деген джашчыкъ, аманлыкъчыны излей, джолгъа чыгъады. Ол Эресейни тюрлю-тюрлю регионларына барыб, алада джашагъан миллетлени маданиятлары бла да шагъырей бола, аманлыкъчыны излеб айланады. Ахырында Батар аны табыб, ол «урлагъан» тынчлыкъны, рахатлыкъны ызына адамлагъа къайтарады. Алай бла, ала алгъынча шохлукъда джашаб тебрейдиле. Аманлыкъчы да, кечмеклик тилеб, алагъа къошулгъанды. Былайда аманлыкъны игилик хорлагъанын кёргюздюле сабийле…
Джыйылгъанла, сабийлени джырлагъанларын, тепсегенлерин, назму айтханларын джаратханларын билдире, харсны тохтатмай эдиле. Сабийлени да бетлери джарыгъаны таныла эди. Концерт тамамланнганында да залдагъыла, ёрге туруб, талай заманны харс уруб турдула.

САЛПАГЪАРЛАНЫ Умар.