Къарачай-Черкесияны Къобан районунда адамны саулугъуна къайгъырыуну, наркотиклеге къаршчы кюрешни айлыгъы барады. Къысхасы бла, адам саулугъундан айырылмаз ючюн, къалай джашаргъа, къалай атларгъа кереклисини юсюнденди сёз.

Айтыргъа, Къобан районну окъуу-билим берген учреждениелеринде наркотиклени адамгъа салгъан заранларыны юсюнден ушакъла, юлгюле бла бегитилген акцияла эмда интерактив мероприятиеле бардырыладыла.
– Бу магъаналы юретиу-ангылатыу ишге устазла, медицина къуллукъчула, профилактика органланы келечилери таукел къошуладыла. Бютюн да аслам иш акъыл-балыкъ болмагъанла бла бардырылады. Ала кеслерин аман джолдан тыяр ючюн, наркотиклени «татыуларына» юренмез ючюн, наркотикле саулукъну эм уллу джаулары болгъанларын, джаш адамланы джашауларын къурутургъа хазыр тургъанларын заманында сабийлеге ангылатыргъа кереклиси хакъды, – деб чертгендиле Къобан районну администрациясында.
Аны бла бирге бу акция бла дагъыда районда бир ашхы иш бардырылгъанын да айтыргъа керекди. «Стена обещаний» – алайды аны аты.
Ол не затды? Окъуучула кеслерини муратларындан, не тукъум джетишимлеге ие болургъа тырмашханларындан бир-бирлерине оюмларын айтадыла. Нюзюрлерине ие болур ючюн, спорт бла кюреширге, игилени-ашхыланы тизгинлеринде болургъа, терен окъуу-билим алыргъа тыйыншлысындан хапарлыдыла. «Игини игилиги джугъар» дегенлей, ашхы юлгю кёргюзюб, тенглерин ызларындан элтген сохтала кеслерини адамлыкъ борчларын толтургъанларын да ангылайдыла.

(Бизни корр.).