Джюрек джылыуун халкъына, Джуртуна атагъан, къушча уча, таукелликни, тириликни, джигитликни тёрюн аулагъан, Ата джуртун сакълай, уруш джоллада юлгю кёргюзе сермешген онглу уланланы бириди Тулпарланы Пилялны джашы Альберт.
Ол 1989-чу джыл аууз-герги (октябрь) айны 25-де Уруп районну Преградна стансесинде туугъанды. Джёгетей Аягъы шахарда 2-чи номерли школда окъугъанды. Билимин андан ары ёсдюре, Санкт-Петербургда СВУ-гъа кириб, 2007-чи джыл аны джетишимли тауусханды. Андан сора Москвадагъы Абычарла хазырлагъан баш аскер училищеде окъуб, аны 2011-чи джыл бошагъанды. Ол джылдан башлаб, тахса алыучу бёлюмледе абычар къуллукълада болгъанды. Альберт 2022-чи джыл байрым (февраль) айны 24-де СВО-гъа баргъанды. Донецк Халкъ Республиканы джерин азатлаугъа къошулуб, эркишилигин, тёзюмюн, тирилигин, джигитлигин тыныта, анга салыннган борчну юлгюлю эте, подполковник чыны бла энчи къуралгъан 56-чы батальонну командири болуб, аскер ишлерин мийик дараджада толтуруб тургъанды.
«Саур-Могила» деген курганны къатында Уллу Хорламны 81-джыллыгъына аталгъан джыйылыуда Донецк Халкъ Республиканы Башчысы Денис Пушилин бизни джердешибизге, Тулпарланы Альбертге, этген джигитлиги ючюн, «Донецк Халкъ Республиканы Джигити» деген ат атаб, Алтын джулдуз эмда республиканы ордени бла саугъалагъанды. Аны юсюнден Къарачай-Черкес Республиканы Башчысы Темрезланы Рашид, республиканы джамагъатына хапар билдире, МАКС-да кесини официал каналында джазгъанды.
«Донецк Халкъ Республиканы джерин азатлагъан сагъатда, Альбертни кёргюзген эркишилигин, джигитлигин, анга салыннган аскер борчну сый бла толтургъанын мюкюл этиудю анга берилген саугъа. Мен Денис Владимировичге, бизни джердешибизни этген ишине аллай мийик багъа бергени ючюн, бек разы болгъанымы билдиреме.
Подполковник чынны джюрютген Альберт СВО-да тыйыншлы къуллукъ этеди. Ол керти патриотлукъну, Джуртха кертиликни юлгюсюн кёргюзеди. Мен Къарачай-Черкес Республиканы бютеу джамагъатыны атындан Альбертни ол тыйыншлы саугъа бла алгъышлайма! Ол саугъа энтда да бир кере, Къарачай-Черкес Республикадан баргъан джашланы джигитликлерин, кючлюлюклерин кёргюзеди. Къарачай-Черкесиядан, бютеу Эресейден баргъан аскерчиле бла, аланы этген джигитликлери бла ёхтемленебиз, махтанабыз. Биз хорларыкъбыз!» – деб джазгъанды Темрезланы Рашид.
Къаплан кёллю къарачай джаш, анга салыннган аскер борчну тыйыншлы дараджада толтура, алгъа барады. Ол миллетибизге, республиканы бютеу джамагъатына сыйды, махтауду.
Алчакъланы Хусей.
