Хычаман (май) айны 18-ден 19-на дери Черкесскеде «Государственно-религиозное взаимодействие как фактор обеспечения единства российского общества» деген регионла арасы конференция бардырылгъанды.

Эки кюнню баргъан конференцияны тамалында кърал власть органланы келечилери, джамагъат эмда дин къуллукъчула, алимле Эресейни тин-иннет байлыгъын, халкъ бирликни сакълаугъа, къралны эркинлигин джакълаугъа дин бирлешликле тыйыншлы юлюш къошханларыны юсюнден сёлешгендиле.
Конференцияны пленар кенгешинде КъЧР-ни миллет ишлерини, кёбчюлюк коммуникациялары бла басмасыны хакъындан министрини орунбасары Сергей Гузко сёлешгенди.
«Республикабызда миллетле эмда динле арасы джарашыулукъ кърал власть органланы, джамагъат эмда дин бирлешликлени кюн сайын баджаргъан ишлерини себебинден орналгъанды. Бизни биригиб ишлегенибиз, шохлукъну сакълагъан бла къалмай, регионда миллет политиканы тыйыншлысыча толтурур мадар берликди», – дегенди Сергей Анатольевич.
Андан сора да пленар кенгешде Къыбыла эмда Шимал Кавказ федерал округланы регионларындан къонакъла, алимле, дин къуллукъчула сёлешгендиле. Ала кеслерини докладларында, эресейчи джамагъатны бирлигин сакълар ючюн, къралны эмда дин къуллукъчуланы арасында къысха байламлылыкъ болургъа кереклисин чертгендиле.

САЛПАГЪАРЛАНЫ Умар.