Гитче Къарачай районну Терезе элинде тамамлы ремонтдан сора «Къууанч» деген сабий сад эшиклерин ачханды. Неси да заманнга келишген сабий учреждениеге 100 джашчыкъ бла къызчыкъ джюрюрюкдюле.

Черкесскеде «Алёнушка» сабий садда да кёб турмай ремонт ишле тамамланныкъдыла. 135 сабий аны ачылырын ашыгъыб сакълайды. Бусагъатда ары мебель ала турадыла, керекли оборудованиени джарашдырадыла. Бу эки сабий садда инженер сетлени толусу бла ауушдургъандыла, мекямланы башларын, тыш къарамларын да джангыртхандыла, джангы эшикле, терезеле да салгъандыла, ичлерин ариу этгендиле.
– Биз сабийлеге не къадар иги, не къадар таб болурча этгенбиз, аны бла бирге алагъа бир затдан да заран неда хыянат джетерик тюлдю, – деб чертгенди КъЧР-ни Башчысы Темрезланы Рашид МАКС-да кесини каналында.
Башчы айтханнга кёре, РФ-ны Президенти Владимир Путинни башламчылыгъы бла джюрюш алгъан уллу программагъа къошулгъан биринчи сабий объектледиле «Къууанч» бла «Алёнушка».