Къарачай-Черкесияда «Эм иги школ хант юй – 2026» деген бютеу Эресей конкурсну регионал этапы бардырылгъанды. Анда алчы оруннга Черкесскеде 15-чи номерли лицейни хант юйю чыкъгъанды. Энди ол республиканы сыйын бютеу Эресей эришиуледе джакъларыкъды.

Регионал конкурс Черкесскеде «Спутник» аралыкъда ётгенди.
– Конкурсда талай затха эс бёлюннгенди: санитар джорукъланы сакъланыуларына, ашны-сууну ненча тюрлю болгъанына, этилген хантны татыууна эмда асыулулугъуна. Конкурс школлада хант юйлени ишлерин игилендириуге джораланнганды, – деб билдиргендиле КъЧР-ни Окъуу бла илму министерствосунда.
Экинчи оруннга Джёгетей Аягъында 4-чю номерли гимназияны хант юйю чыкъгъанды. Ючюнчю оруннга Кавказский посёлок бла Хумара школланы хант юйлери ие болгъандыла. «Школ хант юйню эм иги шапасы» номинацияда Тебердиде 2-чи номерли школну къуллукъчусу хорлагъанды.
Конкурсну къурагъанланы да айтайыкъ: РФ-ны Билим бериу министерствосуну аманаты бла Сохталаны ашларына-сууларына къарагъан федерал аралыкъды. Анга болушлукъ РФ-ны Джамагъат палатасы бла РФ-ны Халкъ фронту этгендиле.