Къызыл Къачны халкъла арасы бирлешлигини 159-джыллыгъына багъышлаб, Шимал Кавказ кърал академияны медицина институтунда биринчи болушлукъ этиу бла байламлы юрениуле бардырылгъандыла.

Студентле къыйын болумгъа тюшген адамгъа эм алгъа къаллай болушлукъ этерге боллугъун кёргюзгендиле. Ким да билгенден, джарсыгъан адамгъа тюз эмда заманында болушлукъ табдырылса, аны джанын къалдырыргъа боллукъду.
– Быллай юрениуле студентлеге билимлерин хайырландырыргъа мадар бередиле. Ала сынамларын ёсдюредиле, кеслерин къалай джюрютюрге кереклисине юренедиле. Заманны ашырмай, зарауатлыкъ джетгеннге терк болушлукъ этерге керекди. Аны бла бирге врачны джюрегинде джазыкъсынмакълыкъ да болургъа тыйыншлыды, ол затны ауругъан сезерге керекди, – деб билдиргендиле ШККъА-ны пресскъуллугъунда.
Быллай мастер-классладан ётген студентле, къолларына дипломларын алыб ишлеб тебреселе, билимлери бла сынамлары бир-бирине келишгенлерине ажымсыз боллукъдула, ол зат алагъа ишде джетишимли болургъа мадар да берлиги хакъды.
– Быллай юрениуле адамланы бир-бирлерине болушургъа, бир-бирлерин игирек ангыларгъа, адамлыкъ шартланы сагъайтыргъа болушадыла, – деб къошхандыла бу ишни къурагъанла.