Шахарланы, эллени джарашдырыу бла байламлы миллет проектни джашауда орунлу эте, Къарачай районну Къумуш элинде сабий шахарчыкъны къурулушу башланнганды. Бюгюнлюкде ол орналлыкъ джерни тюбюн джарашдырыу барады.

Тамалын иги джарашдырыб бошагъандан сора, джумушакъ зат бла юсюн джабарыкъдыла. Керекли къурулуш материалны барысын да алайгъа келтириб къуйгъандыла.
– Бу сабий шахарчыкъ заманны излемине толу джууаб этерикди. Сабийле къоркъмай-юркмей ойнарыкъдыла, джыгъылгъан болса да, джугъун ачытырыкъ тюлдю. Сабийлени уллусу, гитчеси да кесине джараулу затны табарыкъды. Оюн комплексле деменгили джарашдырыллыкъдыла. Сабийлери бла келген аталагъа, аналагъа узун шиндикле, багуш атыучу бёчкечикле салынныкъдыла. Айтыргъа, ала да сабийлери бла бирге бек иги солуб кетерикдиле, – деб хапар айтхандыла
районну администрациясында.
«Джашау-турмуш таблыкъла» деген миллет проектни шахарланы, эллени джарашдырыу бла байламлы федерал проектини тамалында бютеу къралда онлайн халда чёб атыугъа миллет тири къошулады. Къарачай-Черкесияда 12 мингден аслам адам 2027-чи джылда республиканы къалайын джарашдырыргъа тыйыншлыгъа санагъанын билдиргенди. Аны кибик дизайн-проектле ючюн да чёб атхандыла.