Европаны биринчилиги ючюн къол тутушдан бу кюнледе Будапештде бардырылгъан эришиуледе Къарачай-Черкесияны спортчулары 14 медаль бла саугъаланнгандыла.

Европаны алчысы болур муратда, Венгрияны ара шахарына 28 къралны эм кючлю спортчулары баргъандыла. Ала джылларына, ауурлукъларына кёре къауумлагъа юлешиниб, билек кючлерин сынагъандыла. 100-ден аслам айтылгъан спортчуну арасында джердешлерибиз джетишимли болгъандыла.
Эсеблеге кёре, 14-15 джыл болгъан джашла бла къызланы араларында бардырылгъан эришиуледе 45 килограмм ауурлукъда Лепшокъланы Рамазан онг къолу бла 1-чи орунну, сол къолу бла да 2-чи орунну алгъанды. Ол эришиуледе 50 килограмм ауурлукъда Элдарланы Карим сол къолу бла 1-чи орунну, онг къолу бла да 3-чю орунну алгъанды.
16-18 джыл болгъан джашла бла къызланы араларында бардырылгъан эришиуледе 80 килограмм ауурлукъда Токъланы Мухаммад, эки къолу бла да тутушуб, 2 кере да 1-чи орунланы алгъанды.

60 килограмм ауурлукъда Байкъулланы Абдуллах сол къолу бла 1-чи орунну, онг къолу бла да 3-чю орунну алгъанды.
55 килограмм ауурлукъда Лайпанланы Алан сол къолу бла 2-чи орунну алгъанды.
50 килограмм ауурлукъда Байрамкъулланы Абдурахман онг къолу бла 3-чю орунну алгъанды.
19-23 джыл болгъан джашла бла къызланы араларында бардырылгъан эришиуледе 90 килограмм ауурлукъда Волкова Марта эки къолу бла да тутушуб, 2 кере да 1-чи орунланы алгъанды.
60 килограмм ауурлукъда Байрамкъулланы Мухаммад онг къолу бла 2-чи орунну, сол къолу бла да 3-чю орунну алгъанды.
Джетишимли спортчуланы къол тутушну амалларына Токъланы Шамиль, Тамбийланы Рамазан, Эриккенланы Барадин эмда Орусланы Расул юретгендиле.
Къарачай-Черкесияны Башчысы Темрезланы Рашид, спортчуларыбыз туугъан джуртубузгъа уллу сый, махтау келтиргенлерин черте, аланы кеслерин да, тренерлерин да джылы алгъышлагъанды.
«Къарачай-Черкесияны саугъа хазнасына 7 алтын, 3 кюмюш, 4 да джез медаль къошулду. Аламат кёргюзюмлеригиз бла ёхтемленебиз!
Эресейни Армрестлинг федерациясыны вице-президенти Андрей Петров спортчуларыбызны хазырлыкъларына, хорламгъа учуннганларына уллу багъа бергенди. Джаш адамланы хакъ джюрекден алгъышлайма. Тренерлерине, аталарына-аналарына, спортчуланы кеслерине, къаджыкъмай кюрешгенлери ючюн, бюсюреу этеме.
КъЧР-ни Армрестлинг федерациясыны президенти, КъЧР-ни Парламентини депутаты Гочияланы Адамгъа, спортну бу тюрлюсюне тыйыншлы эс бёлюб кюрешгени ючюн, айырыб разылыгъымы билдиреме.
Энди аллай эришиуле абадан къауумну арасында да бардырыллыкъды, ала да къууандырырла деб ышанама», – дегенди.