Бу кюнледе Къарачай-Черкесияны Башчысы Темрезланы Рашид «Россия — Исламский мир: КазаньФорум 2026» деген XVII-чи халкъла арасы экономика форумну тамалында стратегиялы къарамы болгъан (группа стратегического видения) «Россия – Исламский мир» деген къауумну джыл сайын бардырылыучу джыйылыууна къошулгъанды.
Ол джыйылыуда бизни республикадан муфтий Эриккенланы Мухаммат хаджи бла Правительствону Председателини орунбасары Орусланы Марат да болгъандыла.
Быйылгъы джыйылыу РФ-ны Президенти Владимир Путинни излеми бла 2006-чы джыл къуралгъан стратегиялы къауумну 20-джыллыгъына аталгъанды. Алайгъа Эресей бла 25 тыш къралдан алимле, дипломатла, кърал къуллукъчула, дин эмда джамагъат бирлешликлени келечилери джыйылгъандыла.
РФ-ны Вице-премьери Марат Хуснуллин, РФ-ны Президенти Владимир Путинни атындан хошкелди айтыб, Эресей бла муслиман къралланы араларында иш джюрютюуню тамалы келир заманны игилендириуде бир иннетлилик болгъанын чертгенди.
Ислам динни тутхан къралланы келечилери, федерал, регионал органланы къуллукъчулары, дин организацияланы башчылары бусагъатдагъы болумну юсюнден сёлешгендиле. Ала экономика, гуманитар, тин байлыкъ, арада иш джюрютюу, сынам алмашдырыу дегенча ишлени сюзгендиле. Джаш тёлю политиканы бардырыугъа, билим бериуге, маданиятха ёсюм алдырыугъа айырыб эс бёлгендиле.
КъЧР-ни Башчысы Темрезланы Рашид чертгенден, алайда Эресей бла ОИС-ни (Организация исламского сотрудничества) къурамында къралланы араларында байламлылыкъны нени юсю бла бегитирге боллугъу ачыкъ болгъанды.
Джыйылыуда айтылгъанны эсеблей, КъЧР-ни Башчысы Темрезланы Рашид: «Стратегиялы къарамы болгъан «Россия – Исламский мир» деген къауумну юбилей джыйылыуунда айтылгъан башламчылыкъла, этилген оноула муслиман къралла бла иш джюрютюуюбюзню кенгертирге, арада байламлылыкъны иги бегитирге джарарыкъларына ышанама, Ол къауумну къурамында болуб, Къарачай-Черкесия бирге толтуруллукъ проектлеге къошулургъа, арада сатыу-алыуну аслам этерге, маданият, илму, билим бериу ишлеге къошулургъа хазырды. Алай этсек, арада шохлукъ бегирикди, иш джюрютюуюбюз да узакъ болджаллы эмда барыбызгъа да файдалы боллукъду. Ол заманда тюзлюк, рахатлыкъ орналлыкъды», – дегенди.
