Хычаман (май) айны 19-да РФ-ны отлукъну хакъындан министрини орунбасары Петр Конюшенко ишни юсю бла Къарачай-Черкесиягъа келгенди.

Ол мында КъЧР-ни Башчысы Темрезланы Рашид бла тюбешгенди. РФ-ны Президентини ШКФО-да Толу эркинликли келечисини орунбасары Владимир Надыкто, республиканы Правительствосуну къуллукъчулары, федерал къуллукъланы КъЧР-де органларыны башчылары, «Ставропольэнергосбыт» компанияны тамадасы Лев Кузнецов, РФ-ны Экономика айныууну хакъындан министерствосуну ШКФО-да Социал-экономика ёсюмню хакъындан департаменти бла «Россети Северный Кавказ» компанияны келечилери да болгъандыла ол тюбешиуде.
Кърал къуллукъчула Шимал Кавказ федерал округну отлукъ комплексин айнытыуну юсюнден сёлешгендиле, регионлада электрокъууат къалай хайырландырылгъанын да сюзгендиле.
Темрез улу КъЧР-ни не джаны бла да ёсюм ала, адамланы джашауларын игилендириуге аталгъан ишлени асламыракъ эте баргъаны бла байламлы электрокъууат бла таймаздан баджарылыб турургъа кереклисин чертгенди.
Тюбешиуде электрокъууат бла баджаргъан компанияны иши да сюзюлгенди.
Петр Конюшенко Къарачай-Черкесияда хайырландырылгъан токну багъасы заманында тёлениб баргъанын, бизни регионда ол кёргюзюм 96 процент болгъанын айтханды.
КъЧР-ни Башчысы Темрезланы Рашид да: «Мындан ары да ол кёргюзюмню 100-ге джетдирирге кюреширикбиз. Джамагъатны джашау турмушун игилендириуге, регионну отлукъ комплексин бегитиуге аслам эс бёлгенлей турлукъбуз», – дегенди.