Къарачай-Черкесияны сыйлы джамагъаты!
Хычаман (май) айны 21-де Шимал Кавказны миллетлерини кёбюсюню джашауларын ёмюрлюкге тюрлендирген Кавказ къазауатда джарсыгъанланы эсибизге тюшюребиз.

Артыкъсыз да ол кюн, къазауатны кёзюуюнде ауур сынауладан ётюб, миллетликлерин, адеблерин-намысларын сакълагъан ата-бабаларыбызгъа сый берген кёзюудю. Кавказ къазауатда ёлген адыгланы, абазалыланы, къарачайлыланы, ногъайлыланы, къазакъланы, башха миллетлени келечилерини алларында баш иебиз.
Тарихде кёб тюрлю зат болады, анда бизни бир-бирибизни ангыларгъа, сый берирге юретген кёзюуле бардыла. Бюгюнлюкде биз кючлю къралда джашайбыз, Ата джуртубуз, юйюбюз, тарих джолубуз да бирди. Уллу Ата джурт къазауатны джылларында аталарыбыз, къарт аталарыбыз биригиб, джаугъа къаршчы тургъандыла, къазауатдан сора къралны аякъ юсюне салыб кюрешгендиле, мамыр джашау къурагъандыла. Бусагъатда да Эресейни кёб миллетли халкъы, Ата джуртубузну эркинлигин джакълай, аскер къаугъа баргъан джерде салыннган борчланы бет джарыкълы толтурады. Бизни баш борчубуз – рахатлыкъны, мамырлыкъны сакълау, ёсюб келген джаш тёлюню ата-бабаларыбызны джигитликлери бла шагъырей этиу.
Барыгъызгъа да ашхылыкъла, мамырлыкъ, джетишимле теджейбиз. Хар юйде къууанч орналсын, сабий кюлген тауушла эшитилсинле. Кючлю, бирикген къралыбыз Эресейге сюймеклик джюреклерибизде орналсын!

Къарачай-Черкес Республиканы Башчысы
ТЕМРЕЗЛАНЫ Рашид
Къарачай-Черкес Республиканы Халкъ
Джыйылыууну (Парламентини) Председатели
ИВАНОВ Александр
Къарачай-Черкес Республиканы
Правительствосуну Председатели
АРГУНОВ Мурат.