Хычаман (май) айны 5-де Эресейни МВД-ны Къарачай шахарда бёлюмюне 68 джыл болгъан шахарчы тиширыу кесин хыйлачылагъа алдатхан хапарын билдиргенди.

Тиширыу айтхандан, мессенджерлени биринде анга: «Поликлиникадан эсебден чыгъаргъа (открепиться) теджейбиз. Аны ючюн телефонугъузгъа келген кодну айтыргъа керексиз», – деб билдириу келгенди. Тиширыу ала айтханча этгенди. Алай бла, хыйлачыла «Госуслуги» порталда аны энчи кабинетине кириб, энчи данныйлери бла хайырланыб, тиширыуну аты бла электрон ышаныу къагъыт (доверенность) джарашдыргъандыла.
Бир кесекден тиширыугъа ол танымагъан биреулен къонгурау къагъыб: «Сизге хыйлачылыкъ бла байламлы терслеу иш ачылгъанды. Ишигиз тереннге кетмез ючюн, ачхагъызны «къоркъуусуз» счётха ашырыргъа керексиз», – дегенди. Тиширыу, анга ийнаныб, алтотур (март) айны 31-ден арттотур (апрель) 15-не дери, Черкесск шахаргъа джюрюб, сатыу-алыу аралыкъланы биринде хыйлачылагъа ачха ашырыб тургъанды. Бютеулей да тиширыу 1 790 000 сомундан къуру къалгъанды.

КъЧР-ни МВД-ны пресс-къуллугъу.