Республикан аралыкъда «Юбилейный» деген спорт комплексде боксдан халкъла арасы эришиуле болдула.

Джыл сайын да, Къарачай халкъны джангырыу кюнюне аталыб, джаш адамланы арасында быллай эришиуле бардырылгъанлай турадыла. Аланы къурагъан джаш тёлюбюзню тамбласына таймаздан къайгъыргъанлай тургъан адамыбыз Гаталаны Александрды (Эдик хаджи). Анга тукъум тамадала эмда «Къарачай – алан халкъ» джамагъат бирлешлик да болушхандыла.
– Республикабызны боксдан баш тренери Халкёчланы Эльбрус бу эришиулени бардырыугъа уллу къыйын салгъанын чертерге тыйыншлыды, – дейди Эдик хаджи.
Айтханыбызча, халкъла арасы дараджада болгъаны себебли, кесибизни республикадан тышында да, Таджикистандан, Азербайджандан, Кърымдан, Дагъыстандан, Къабарты-Малкъардан, Тегейден, Ставрополь крайдан келген эдиле джаш гёджебле. Джюзден аслам адам къошулгъан бу эришиуле, Къарачай-Черкес Республиканы спорт министри Дмитрий Тенц чертгенден, ариу халда ётгендиле. Хорламлы болгъанланы бары да, 50 гёджеб эмда тренерлери, махтау къагъытла, саугъала алгъандыла. Биринчилеге уа, 21 адамгъа, чемпион белибаула да берилгенди. Аланы барын да тизмесек да, кесибизни республикадан хорламлы болгъанланы атларын айтайыкъ: Халкёчланы Ахмад, Хахандуков Аслан, Халкёчланы Халит, Хубийланы Амир, Халкёчланы Эмиран, Карданов Азамат, Созарукъланы Азрет-Алий, Эриккенланы Хамит, Хубийланы Керам, Къаракетланы Айдемир, Теуналаны Карим.
Джашланы алгъышлай, ызы къалын болсун дейбиз, джангы хорламла теджейбиз.
Гаталаны Эдик хаджиге уа «Къарачай» газетни къуллукъчуларын да кубок бла, медаль бла саугъалагъаны эмда газетге болушлукъ этгенлей тургъаны ючюн разылыгъыбызны билдиребиз.

(БИЗНИ КОРР.).