«Архызда» тау аякъ чаналаны 2025-чи – 2026-чы джыллада къышхы кёзюую тамамланды. Аны эсеблерине кёре, ол былтыр эндреуюк (декабрь) айны 6-дан быйыл хычаман (май) айны 11-не дери баргъанды.

Курортну пресс-къуллугъу билдиргенден, кёзюу ачылгъан кюн огъуна «Архыз» «Горы России» деген кубок бла саугъаланнганды. Аны бла да къалмай, саулай къралыбызда курортланы арасында эм иги курортха саналгъанды экинчи кере. Озгъан къыш тамам къарлы, узун къыш болгъаны аякъ чаналада учаргъа спортну сюйгенлеге уллу себеб болгъан эди. Дагъыда курорт «Russian Traveler Awards 2025» атлы уллу спорт эришиулени да «Территория познания» деген тюрлюсюнде хорламлы болуб, анга «Автомаршрут года» деген ат берилгенди.
Курортну тауларыны къарлы сыртларында сабийлени арасында «Архызенок» деген, абадан къауумну арасында да «Кубок Архыза Мастерс» ёчге эмда фрифрайд тюрлюсюнден да биринчи кере эришиуле бардырылгъандыла. Андан сора да, «Архыз» курортда «Горнолыжка» деген сериалны алгъандыла. Къралыбызны бирси джерлериндеча, тау аякъ чаналада учаргъа сюйгенле, къонакъла, башхала да анда «География диктант» джазгъандыла. Аны кибик Уллу Хорламны кюнюнде тау лыжа чаналаны джолларыны тёбен тюшген джеринде «Ёлюмсюз полк» акцияны бардыргъандыла.

(БИЗНИ КОРР.).