Тюз иннети игиликге учундура, халкъына халал къуллукъ эте джашайды Деккушланы Борисни джашы Руслан. Аны джарыкъ фахмусу, билими, тирилиги ашхылыкъны джолун тутуб, алгъа атлайды ол.
Руслан 1973-чю джыл хычаман (май) айны 27-де Ючкекенде, Борисни огъурлу юйдегисинде, туугъанды. Орта школну былайда айырмагъа бошагъандан сора, билим джолда таукел алгъа бара, Дондагъы Ростовда кърал академиягъа кириб, 1996-чы джыл аны «Бухгалтерский учёт и аудит» деген факультетин джетишимли тауусуб, «экономист» усталыкъ алыб чыкъгъанды. Таулу джаш, билимин андан ары ёсдюрюрге, кенгнгертирге талпыб, Белгороддагъы кърал университетге кириб, аны юристле хазырлагъан факультетинде окъуб чыкъгъанды. Аны Къарачай-Черкес Республиканы Башчысы бла Правительствосуну Кадрлагъа, политикагъа эмда къурау ишлеге къарагъан управлениесине баш уста къуллукъчу этиб ишге аладыла. Былайда ишлеген эки джылгъа джууукъ заманны ичинде, анга салыннган джууаблы борчну сый бла толтура, ол таукел алгъа баргъанды, ишге тири джюрюш бергенди. Таулу джашны 2002-чи джыл толтуруучу властны Къарачай-Черкес Республикада регионал бёлюмю, Урунууну кърал инспекциясыны тамадасы – урунууну баш инспектору къуллукъгъа саладыла. Ол джангы къуллугъуну джууаблылыгъына терен эс бёлюб, ишинде заманны излемине кёре джангы мадарланы, амалланы хайырландырыб, аны дараджасын кёлтюреди. Ол организациялада, учреждениеледе, башха кърал къуллукълада урунуу законну излеми къалай толгъанына къарай, план бла белгиленнгенледен тышында да тинтиуле бардырады. Законну бузулгъан джери болса, аны тюзетир мадарла къурайды. Ол башчылыкъ этген инспекция ишчилени урунуу эркинликлерин джакълайды, тарыгъыу къагъытлагъа къараб, тинтиуле къурайды, тыйыншлы джерде тазирле салады, башха кёб иш бардыргъанлай турады. Ол мамыр джашауну, кертиликни, тюзлюкню джолун бара, къуллугъуна кесин толу бериб, уллугъа, гитчеге къайгъыра, кёбледен бюсюреу табыб ишлейди.
Руслан, билим тауну тёппесине ёрлей, 2012-чи джыл экономика джаны бла аспирантурада окъуб, «Организационно-экономические отношения и процессы государственного регулирования воспроизводства трудовых ресурсов депрессивных территорий» деген темагъа кандидат диссертациясын джетишимли джакълаб, экономика илмуланы кандидаты болады.
Кърал, аны фахмусуна, билимине, чыгъармачылыкъ ишине багъа бере, 2008-чи джыл Эресей Федерацияны кърал кенгешчиси деб, 3-чю класслы чын бергенди. 2013-чю джыл да «Къарачай-Черкес Республиканы махтаулу юристи» деген ат атагъанды.
Руслан 2023-чю джылны аууз-герги (октябрь) айыны 9-дан Стандартизация бла метрологияны Шимал Кавказ аралыгъыны Къарачай-Черкес Республикада филиалыны директоруну орунбасары болуб ишге киреди. Ол, тутхан ишине терен эс бёлюб, анда да атын сый бла айтдырыб ишлейди. Аны 2024-чю джыл къыркъар (август) айны 1-де «Маркетинг» секторну тамадасы этиб саладыла. Былайда да фахмусуну, билимини, тирилигини кючюн танытады.
Деккуш улу 2026-чы джыл байрым (февраль) айны 23-ден бери филиалны директору къуллукъну толтурады. Аны таб башчылыкъ этиую бла бу къуллукъ адамны джашау джолунда терен магъанасы болгъан кёб тюрлю иш баджарады. Анга салыннган джууаблы борчну къысха заманны ичинде сый бла толтурургъа терен эс бёледи. Уллу мекямны ала тургъан джерине, гаражлагъа, башха ууакъ мюлклеге ремонт этидириб, айбат тюрсюн алдыргъанды. Ол айтхандан, былайыны коллективи ишлерине терен къайгъыргъан, фахмулу адамладан къуралгъанды. Анда тюрлю-тюрлю халкъланы келечилери, арада шохлукъну, ангыламакълыкъны кючюн бегите, тутхан ишлерини дараджасын кёлтюре, ишлейдиле. Аланы арасында 30-40-50 джыл ишлеген ветеранла, орта джылгъыла, джаш адамла да бардыла.
Ала багъыу учреждениеледе медицина техникадан башлаб, коммунал санагъатда турмуш счётчиклеге дери тинтедиле. Нефтден этилген затла бла ишлегенлени контролда тутадыла, промышленность комплексге, окъуу учреждениелеге, организациялагъа къарайдыла. Ёлчелеген системалагъа, электрикле ишлеринде хайырландыргъан аппаратлагъа, токну кючюн кёргюзген приборлагъа, ток бла байламлы башха 30 тюрлю затха, джылыу берген техника мадарлагъа, барометрлеге, аспираторлагъа, басымны калибраторларына, газны кёб бла аз болгъанын билдирген комплекслеге, расходомерлеге, газны счётчиклерине дагъыда бу джаны бла 60 тюрлю затха, механика эмда геометрия джаны бла ёлчелеген кёб тюрлю затха къарайдыла. Деккушланы Руслан ишин не джаны бла да деменгили тындыргъан адамды.
Лепшокъланы Хусеин.
