Халал джюрекли, кенг фахмулу, терен билимли, онглу уланларыбызны бириди Лепшокъланы Магометни джашы Владимир. Ол, мамырлыкъны огъур къанатын джая, адамлагъа ашхылыкъ къурай, тирилик таныта, таукел алгъа барады.
Владимир 1957-чи джыл арттотур (апрель) айны 26-да Къыргъызияны Сокулинский районунда Чаткуль шахарда Магометни халкъны ашхы адетлерин тутуб джашагъан юйдегисинде туугъанды. Кёчюрюлген халкълагъа эркинлик берилиб, Джуртларына тебрегенлеринде, къарачай халкъ джуртуна – Кавказгъа – къайтады. Лепшокъланы юйюрлери туугъан эллерине Даусузгъа келедиле. Владимир былайда орта билим берген школну иги бошайды, джамагъат ишлеге да къошула, устазладан бюсюреу табады. Аны заманы джетиб, Совет Аскерге барыб, ол джууаблы, сыйлы борчун махтау бла толтуруб къайтады. Билим джолда алгъа бара, Ставрополдагъы эл мюлк институтха кириб, аны джетишимли тауусуб, «зооинженерия» деген усталыкъ алыб чыгъады. Ол ВЦСПС-ни Архыздагъы курорт ара базасына комендант болуб ишге киреди. Былайгъа келген туристлени хар нелерине къараб, алагъа таб болум къураб, сый бла 4 джылны ишлейди. Ол кёзюуню ичинде келген туристлени керекли затларын джарашдыргъандан сора да, халкъыбыз къонакъгъа сюйюб къарагъанын билдиргенди, аны ашхы адетлери бла шагъырей этгенди. Ол алайдан Даусузгъа къайтыб, мында «Микрокомпонент» заводха бёлюмге тамада болуб ишге джарашады. Анга салыннган борчланы юлгюлю толтуруб, атын сый бла айтдырады. Аны алайдан Граждан къоруулауну тамадасы къуллукъгъа саладыла. Анда къоркъуусузлукъ джаны бла да ишле бардыра, заводну адамлары ишни заманында кеслерин къалай тутаргъа кереклилерин юрете, къоркъуусузлукъну излеми бла шагъырей этиб, бу джаны бла кёб адамны билимин ёсдюргенди.
Лепшокъ улу, Черкесск шахаргъа келиб, кеси энчи иш ачаргъа мадарла къурайды, 2007-чи джыл Ставрополда медицина колледжни бошаб, формацевт усталыкъ алыб чыгъады. Таулу джаш, медицина джаны бла кюреширге таукел болуб, 1997-чи джыл Ленин атлы орамда аптека ачады. Ол ишни бардырыргъа медицина устала алыб, аптеканы хар несин джарашдырыб, адамланы керекли дарман-дары бла баджарыб башлайды. Халкъ бери юрениб, мындан керекли затын табады. Аптеканы къуллукъчулары ауругъанланы кереклилерине терен эс бёлюб, къайгъырыб къарайдыла. Адамла разы болуб, аптекада ишлегенлеге этген оюмларын, разылыкъларын аптеканы тефтерине джазадыла. Бусагъатда аллай 2 тефтер сакъланады. Заман бара, шахарчыла башха джерде да аптеканы филиалы ачылса излейдиле. Владимир, халкъны тилегин къабыл эте, шахарны къыбыла джанында, Косманавтов атлы орамда, Н.Г. Петрусевични майданындан узакъ болмай, филиал ачады. Джамагъатны излемин толтура, законну-джорукъну тамалында, аны ишин да таб джарашдырады.
Владимирни аптекаларында, А къауумдан болуб, бек кючлю дарманладан къалгъаны бары да барды.
Владимир Ростов, Краснодар, Ставрополь, Пятигорск шахарладан дарманланы чыгъаргъан фирмала бла ачыкъ ишлейди. Саудан сатхан поставщикле бла да къысха байламлыды.
Аны дарман мадарлары иш этиб джарашдырылгъан шкафлада, бузлатыучулада, температурасы келишген джерледе сакъланадыла. Эки аптека да тохтаусуз ишлейди, алада кюнортагъа тохтагъан, солуу кюн джокъду. Адамла алгъаракъ заказ этселе, ол ишни да тыйыншлысыча толтурадыла. Не тюрлю дарманны да багъасы, законну-джорукъну тамалында, адамлагъа таб болурча къуралгъанды.
Лепшокъ улуну Саулукъ сакълау министерстводан, бу иш бла кюреширге эркинлик берген, хар заманда да джарагъан лицензиялары бардыла. Эки аптекада да усталыкълары келишген, билимли, фахмулу, адамла бла таб, ариу сёлеше билген, аланы ишлерин тыйыншлы дараджада толтургъан 15-ге джууукъ медицина къуллукъчу – фармацевт – ишлейди.
Владимир адамланы саулукъларын тюзетиуге энчи юлюш къоша, джамагъатха халал къуллукъ эте, къарыуун, кючюн аямай кюрешеди. Ол халкъыны атын сый бла айтдыргъан, аны джумушуна, ишине къайгъыргъан ашхы уланланы бириди.
Алчакъланы Хусей.
