Къарачай-Черкесияны ара шахарында орналгъан Хорламны паркында «Эсгериуню терек бачхасы» деген акцияны тамалында 50 джаш терекчик орнатылгъанды.

Ол терекле паркда, Уллу Ата джурт къазауатда ёлгенлеге аталгъан эсгертмени къатында, ёсерикдиле. Кеслери да Ата джуртну джауладан къоруулай джан бергенлени эсге салгъанлай турлукъдула. Алгъаракъда быллай халкъла арасы акцияны джашаугъа сингдире, былайда 20 терек салыннганды.
– Былтыр «Эсгериуню терек бачхасы» деген акцияны тамалында сакура тереклени орнатхан эдик. Быйыл ала ариу чакъгъандыла. Бютеулей да бу проектни джашауда орунлу эте, 470 терек орнатханбыз. Ала бизни джигитлик этиб ёлген джердешлерибизни сыйларына аталгъандыла. Бизни джерлеге келишген тереклени сайлаб салгъанбыз. Ала, къуу болмай, чагъыб, джашаб турлукъларын излейбиз, – деб джазгъанды кесини соцсетлеринде Черкесскени мэри Алексей Баскаев.
«Эсгериуню терек бачхасы» деген халкъла арасы акция биринчи кере 2020-чы джыл бардырылгъанды. Ол Уллу Ата джурт къазауатда ёлгенлеге аталгъанды. Алай бла, тёрт джылны ичине беш мелиуандан аслам адам къошулгъанды бу ашхы ишге. Ала 100 мелиуандан аслам терек орнатхандыла. Ол терекле, азатлыкъ ючюн джан бергенлени эсге сала, Эресейде эмда тыш къраллада ёсерикдиле.