Республиканы ара шахарында ГОЧС РГБУ-ну окъуу-методика аралыгъында отдан сакълаучуланы юрениулери бардырылгъандыла.

Билимлерин, усталыкъларын 24 адам ёсдюргенди. Байрым (февраль) айны 2-ден хычаман (май) айны 8-не дери бардырылгъан курслада кёб затха юретгендиле.
– Отдан сакълаучула, отну джукълатхандан сора да, кёб тюрлю болушлукъ этедиле миллетге. От тюшген джерден адамланы чырмаусуз чыгъарыу да аланы бириди. Ала джунчумазгъа, эс ташламазгъа, кеслерин керти усталача джюрютюрге керекдиле. Ол затлагъа курслада юретедиле. Аны амалтын керекди быллай юрениуле бардырыргъа, – деб чертгендиле КъЧР-ни МЧС-ни пресс-къуллугъунда.
Курсланы тауусханла къыйын болумда кеслерин тыйыншлы джюрютюрча болгъандыла. Алагъа ол затны бегитген къагъытла да берилгендиле. Билмегенлерин билген от джукълатыучула энди ишлерин таукел къолгъа алырча болгъанларын чертгендиле министерствода.
Бу джууаблы ишде ишлеб башлардан алгъа, отдан сакълаучула быллай юрениуледен ётерге керекдиле. Алайды, иги хазырланнган адам тутхан ишин тынгылы баджарлыкъды.