Черкесскени «Журавлик» школгъа дери учреждениесинде патриотлукъ сезимлени туудургъан джыйылыу болгъанды.

Ары Эресей гвардияны Къарачай-Черкес управлениесини «Клинок» СОБР-ны къуллукъчусу полицияны майору Артур К. да чакъырылгъанды. Тюбешиу Уллу Хорламны 81-джыллыгъына аталгъанды.
Сабийле тюбешиуге иги хазырланнгандыла: назму айтхандыла, къазауатха багъышланнган джырланы джырлагъандыла. Артур сабийлеге Уллу Хорламны юсюнден хапар айтханды, бюгюнлюкде Эресей гвардияны къуллукъчулары, къралны адамлары тынч-рахат джашар ючюн, къолларындан келгенни аямай кюрешгенлерин чертгенди. Къралыны ётген джолун, аны махтаулу тарихин билирге кереклисин да эсгертгенди ол.
Тюбешиу джылы халда ётгенди. Эресей гвардиячыны айтханына сабийле уллу эс бёлюб тынгылагъандыла. Сёзсюз да, ала кёб затны биринчи кере эшитген болурла. Бу тукъум тюбешиу сабий джюрекледе Ата джуртха сюймекликни урлукъларын атханды, аланы игиликге-ашхылыкъгъа учундургъанды. Школгъа дери учреждениени администрациясы полицияны майору К. Артургъа разылыгъын билдиргенди.