Мындан алда Къарачай-Черкесияны Басма юйюнде Дагъыстандан бизни республикада келечи болуб ишлеген Магомедов Магомедни башламчылыгъы бла джыйылыу болду.

Алайгъа келгенлени арасында район тамадала, джамагъат бирлешликлени, сууаблыкъ фондланы тамадалары, республиканы кёбчюлюк информация мадарларыны къуллукъчулары дагъыда башхала бар эдиле.
Джыйылыуда сёз табигъатны услулугъундан Дагъыстан Республиканы бир къауум тау районуна, аны джамагъатына джетген заранны къората, Къарачай-Черкес Республикадан этилген болушлукъну юсюнден барды. Магомедов Магомед, разылыгъын билдириб, эки республиканы арасында шохлукъну кючю бурундан, ата-бабаларыбызны заманындан келгенин, бизден къарнаш миллетге баргъан болушлукъну юсюнден да хапар айтыб, Дагъыстанны бютеу джамагъатыны атындан Къарачай-Черкес Республиканы джамагъатына бюсюреу этди. Джыйылгъанланы арасында Гитче Къарачай районну администрациясыны башчысы Байрамукъланы Рамазан, Къарачай шахар округну алгъыннгы мэри Дотдайланы Альберт, Хабез районну администрациясыны башчысы Жужуев Тимур, Нарсана шахарны Думасыны депутаты Байчораланы Мурат, Дагъыстан Республика бла къарнаш шохлукъ джюрютюб тургъан тукъум башчы Уккуланы Арсен, «Территория милосердия» фондну къурагъан джердешибиз Къобанланы Расул, республиканы джамагъат бирлешликлерини тамадалары дагъыда башхала бар эдиле.

Алайда, республикабызны джамагъаты биригиб, ачха, кийимле, турмуш керек, ашарыкъ, 120-дан аслам КамАЗ машина бла бир суу, джашау турмушда хайырландырылгъан башха затла джыйыб, Дагъыстанны инджилген халкъына ийиб тургъанларын айтдыла. Болушлукъ табдыргъандан сора да, алагъа сагъыш этгенлерин, джюреклери бла къайгъыргъанларын билдирдиле. Ала Кавказны халкълары, керек болса, къачан да бир-бирине болушуб тургъанларын, мындан ары да алай этериклерин чертдиле.
Джыйылыуну аягъында Магомедов Магомед ол ишге айырыб кёб къыйынлары кирген талай адамны Дагъыстанны Правительствосуну Хурмет грамоталары эмда Бюсюреу къагъытлары бла саугъалады.

(Бизни корр.).