Къарачай-Черкесияны келечилери «Россия – Исламский мир: KazanForum – 2026» деген халкъла арасы форумгъа къошулгъандыла.
Бу кюнледе Къазанда Эресей бла муслиман къралланы араларында иш джюрютюуню кенгертир ючюн къуралгъан «Россия — Исламский мир: KazanForum – 2026» деген халкъла арасы экономика форум башланнганды. Анга 100 къралны келечиси къошулгъанды.
КъЧР-ни Башчысы Темрезланы Рашид, республиканы муфтийи Эриккенланы Мухаммат хаджи, КъЧР-ни Правительствосундан да талай къуллукъчу андадыла.
Форумну юсюнден КъЧР-ни Башчысы Темрезланы Рашид МАХ мессенджерде кесини каналында: «РФ-ны Президенти Владимир Путин, форумгъа къошулгъанлагъа хошкелди айта, Эресей муслиман къралла бла шохлукъ джюрютюуге, тыш политика бардыргъан заманда да ала бла келишиулю ишлеуге уллу магъана бергенин чертгенди.
Казанда форум да Эресей Федерация бла Ислам динни тутхан къралланы бирлешлигини арасында сатыу-алыу, экономика, илму-техника, социал, маданият санагъатланы юслери бла байламлылыкъны бегитир мурат бла къуралгъанды», – деб джазгъанды.
Форум хычаман (май) айны 17-не дери барлыкъды. Аны тамалында экономиканы, промышленностну, логистиканы, цифровизацияны, инвестицияланы ёсдюрюуге, халкъла арасы иш джюрютюуню кенгертиуге аталгъан 150 иш бардырыллыкъды.
Анда Эресей Федерацияны регионларыны стендлери да тизилгендиле. Алайда Къарачай-Черкесияны уллу джетишимлерин кёргюзген, республиканы алчы предприятиелери чыгъаргъан продукцияны эмда инвесторланы кёллендирирге джараулу проектлени баямлагъан стенд да барды. Сёзден, туризмге уллу ёсюм алдырлыкъгъа саналыб, «Архыз» аэропорт комплексни къурулушуну, Доммайда ишленник «Аманаууз» къонакъ юйюню проектлери дагъыда «Вулкам» компанияны джюнню джарашдырыугъа аталгъан проекти салыннгандыла.
Анга къараб, РФ-ны Вице-премьери Марат Хуснуллин КъЧР-ни инвесторланы кёллендирир хыйсабы уллу болгъанын чертгенди.
Темрезланы Рашид да Марат Шакирзяновичге регионубузну промышленность, эл мюлк, къурулуш санагъатларына ёсюм алдырыргъа джарарыкъ проектлени юслеринден толу хапар айтханды. Бизни регионнга эс бёлюб, кёлтюргючлюк этиб тургъаны ючюн, Вице-премьерге разылыгъын да билдиргенди.
Темрез улу Эресейни Президенти бла Правительствосу кёлтюргючлюк этиб, Марат Хуснуллин кеси да къайгъырыб тургъаны бла уллу, магъаналы проектлерибиз толтурулуб баргъанларын, аны себебинден регионубуз да ёсюм алгъанын чертгенди.
