Бу кюнледе Къарачай-Черкесияны Башчысы Темрезланы Рашид Хабез районну администрациясыны башчысы Тимур Жужуев бла тюбешгенди.

Тюбешиуде сёз Хабез районну социал-экономика айныууну, миллет проектле бла республикан программаланы толтурууну, СВО-гъа къошулгъанла бла аланы юйдегилерине болушлукъ этиуню юсюнден баргъанды.
Ушакъда джамагъатны таза суу бла баджарыуну юсюнден да сёлешиннгенди. Алайда айтылгъаннга кёре, Зеюко бла Бесленей эллени суу бла баджарлыкъ системаны къурулушун бардырыр ючюн керекли къагъытла джарашдырылыб хазыр этилгендиле, Али-Бердуковский элге баргъан суу быргъыланы джангыртыу да планнга тюшюрюлгенди.
Ол районда битимни буз ургъандан сакълаугъа аталгъан ишле да этиледиле. Кош-Хаблде булутланы чачхан керек (градобойная установка) кёб турмай ишлеб башларыкъды.
Анда адамланы къоркъуулу юйледен кёчюрюуге аталгъан программа да тири толтурулады. Ол программаны тамалында анда юч кёб фатарлы юй ишлениб, хайырланыугъа берирге хазыр этиле турады. Аланы экиси Бесленейде, бири да Псаучье-Дахе элде ишленнгендиле.
Хабез районда билим бериуню дараджасын ёсдюрюуге да иги эс бёлюнеди. КъЧР-ни Башчысыны болушлугъу бла районну бютеу школлары да заманны излемлерине келишдирилгендиле. Хабезде лицейни къурулушу да тамамланнганды. Бусагъатда ремонт ишле Гитче Зеленчукде орта школ бла Бавуко элде «Нарт» деген сабий садда бардырыладыла.
«Сабийле хар нелери да таб джарашхан, бусагъат заманны излемлерине келишген школлада окъургъа керекдиле. Алай этиу бизни баш борчларыбызны бириди», – дегенди республиканы Башчысы.
Тимур Жужуев Темрезланы Рашидге Псаучье-Дахе элде кёбчюлюк хайырланыучу джерлени айбат этиуге аталгъан ишле да тири бардырылгъанларыны юсюнден айтханды.
Аны хапарына тынгылагъандан сора, республиканы Башчысы муниципалитетде аслам эс бёлюрге керекли ишлени, социал магъаналы джумушланы белгилегенди.
Анда болгъаныны юсюнден Темрез улу: «Хабез район кюнден кюннге ёсюм ала барады, аны башчылыгъы ишин иги баджарады. Этилген ишле адамланы джашау турмушларын табыракъ къураргъа джарасала, эм игиси олду», – дегенди.