Хычаман (май) айны 13-де имам Абу Ханифаны атын джюрютген Къарачай-Черкес ислам институтда «Специфика использования социальных сетей и сети Интернет в профессиональной деятельности религиозных организаций» деген темагъа окъуу семинар бардырылды.
Ол семинар КъЧР-ни Муслиманларыны дин управлениесини, Къарачай-Черкес ислам институтну, Ислам маданиятха, илму бла билим бериуге кёлтюргючлюк этген фондну болушлукълары бла къуралгъан эди.
Анга КъЧР-ни Миллет ишлерини, кёбчюлюк коммуникациялары бла басмасыны хакъындан министерствосуну келечилери, журналистле, дин къуллукъчула, социал сетле бла байламлы устала къошулгъандыла.
Окъуу семинарда сёз дин бирлешликлени ишлеринде социал сетлени, интернетни, джалгъан ангыны (искусственный интеллект) хайырландырыуну, аны бла байламлы закон бузулмазча этиуню юсюнден барды.
Семинарны Къарачай-Черкес ислам институтну ректору Къайытланы Ахмат хаджи ачды. Ол бюгюнлюкде социал сетле джашауубузда энчи орун алгъанлары себебли, аланы юслери бла дин бирлешликлени ишлерин кёргюзюуню магъанасын чертди.
– Бюгюнлюкде, медиа санагъат ёсюм алыб баргъан заманда, биз ишибизни социал сетледе да кёргюзюрге керекбиз, нек десегиз, адамланы кёбюсю интернет бла хайырланады, хар нени да андан биледи. КъЧР-ни муфтийи Эриккенланы Мухаммат хаджи да бизге ол борчну салады. Ислам маданиятха, илму бла билим бериуге кёлтюргючлюк этген фондну болушлугъу бла биз тюрлю-тюрлю ишле къурагъанлай турабыз. Бюгюннгю семинар да аланы бириди. Анга къошулгъанла кеслерине джараулу затланы билликдиле, – деди Къайытланы Ахмат хаджи.
Аны ызындан Ислам маданиятха, илму бла билим бериуге кёлтюргючлюк этген фондну устасы Айрат Аймалетдинов сёлешди.
– Социал сетле бла интернет платформала джамагъат оюмну къурауда, джаш тёлюню ангысын ёсдюрюуде, миллетле эмда динле арасы джарашыулукъну бегитиуде тыйыншлы орун аладыла. Джангы технологияланы тыйыншлысыча хайырландырыб, дин бирлешликле джамагъат бла къысха байламлылыкъ джюрютюрге, соруулагъа джууаб берирге, терс информация джайылмазча этерге боллукъдула. Алай болса да, интернетни къоркъуулу затлары да кёбдю. Арт кёзюуде терроризмни, экстремизмни профилактикасы, миллетлени арасында къайгъы чыгъарыугъа къаршчы кюреш, джаш тёлюню аманлыкъ ишледен тыйыу баш орунну аладыла. Информацион къоркъуусузлукъну баджарыр ючюн, кърал власть органла, дин бирлешликле, полицияны къуллукъчулары биригиб ишлерге керекдиле. Бу семинар да ол затлагъа эс бёлдюрюр ючюн къуралгъанды, – деди Айрат Аймалетдинов.
КъЧР-ни Миллет ишлерини, кёбчюлюк коммуникациялары бла басмасыны хакъындан министерствосуну СМИ-ле бла ишлеуню эмда басма ишни юсюнден бёлюмюню тамадасы Аджиланы Руслан да джыйылгъанлагъа хошкелди айтды, семинарны уллу магъанасы болгъанын чертди.
Ызы бла сёз КъЧР-ни МВД-ны Экстремизмге къаршчы кюреш бардыргъан аралыгъыны къуллукъчусу полицияны майору Ирина Пхешховагъа берилди. Ол экстремизм бла терроризмни профилактикасын бардырыуда социал сетлени хайырландырыуну, РФ-ны Юстиция министерствосу тыйгъыч салгъан материалла бла хайырланмазгъа кереклисини, законну бузгъан джууабха тартылгъаныны юсюнден толу хапар айтды.
Социал сетле бла байламлы эксперт Арина Койчева «Практические аспекты использования социальных сетей и сети интернет в деятельности религиозных организаций» деген темагъа доклад этди. Андан сора Пятигорскеде кърал университетни медиа аралыгъыны видеомонтажны хакъындан баш инженери Биджиланы Алихан джалгъан ангыны хайырландырыуну, ол джаны бла билим ёсдюрюуню юсюнден айтды.
Семинарны ахырында анга къошулгъанла усталагъа соруула бериб, алагъа тынгылы джууабла алдыла.
САЛПАГЪАРЛАНЫ Умар.
