Хычаман (май) айны 1-де хыйлачыла Черкесск шахарда джашагъан 70 джыл болгъан тиширыугъа КъЧР-де, Самара эмда Свердловск областлада, Индонезияда эсебде болгъан номерле бла къонгурау къагъыб тургъандыла.

Ала тиширыугъа Росфинмониторингни къуллукъчуларыны атындан сёлешиб: «Сизни «Госуслуги» порталда энчи кабинетигизге аманлыкъчыла киргендиле. Ала ачхагъызны алыргъа боллукъдула. Алай болмаз ючюн, 870 минг сомугъузну къоркъуусуз счётха ашырыргъа керексиз», – дегендиле.
Тиширыу, хыйлачылагъа ийнаныб, Ессентуки шахарда банкоматха барыб, ачхасын ала айтхан счётха ашыргъанды. Ачханы алгъанларындан сора хыйлачыла байламлылыкъгъа чыкъгъанны къойгъандыла. Тиширыу да, кесин алдатханын ангылаб, полиция къуллукъчулагъа тарыкъгъанды.
Аны бла байламлы терслеу иш ачылгъанды. Полицияны къуллукъчулары хайлачыланы ачыкълау бла кюрешедиле.
Арт кёзюуде хыйлачыла, адамлагъа къонгурау къагъыб, тюрлю-тюрлю кърал органланы атларындан сёлешиб, «кърал джумушланы порталында сизни энчи кабинетигизге аманлыкъчыла киргендиле» дегенни айтадыла. Адамла да алагъа ийнаныб, ачхаларын «къоркъуусуз» счётлагъа ашырадыла. Сиз хыйлачылагъа бегирек ийнанырча, «Госуслуги» порталда энчи кабинетигизге ала кеслери кирирге боллукъдула. Алай бла, сиз танымагъан адам, къонгурау къагъыб, мен кърал органны къуллукъчусума деб, СМС-кодну айтырыгъызны излесе, телефонну салыб къоюгъуз.
Энчи кабинетигизге хыйлачыла кирселе, кесигиз паролну ауушдуругъуз. Эсигизде тутугъуз: кърал органланы къуллукъчулары адамла бла байламлылыкъгъа мессенджерледе чыкъмайдыла.

КъЧР-ни МВД-ны пресс-къуллугъу.