Бу арт джыллада бизни республикада кёб джангы межгит ишленнгенди. Ма бу кюнледе да Зеленчук районну Къарданик стансесинде бир джангы межгит ачылды.
Аны ачылыууна аталгъан джыйылыуда кёб адам бар эди. Алайгъа, къуру Къарачай-Черкесиядан болуб къалмай, Терк Башы Тегейни муфтийи Хаджимурат Гацалов, Дагъыстан Республиканы муфтийини болушчусу Ахмад Надырбеков дагъыда башха республикаладан келген сыйлы къонакъла келген эдиле.
КъЧР-ни муфтийи Эриккенланы Мухаммат хаджи, джыйылгъанлагъа хошкелди айта, Къызыл Октябрдан Чотчаланы Хусейни джашы Юсюпге, бу межгитни ишлетгени ючюн, уллу бюсюреу этиб сёлешди. Межгитге да Джума-межгит деб атады.
Чотча улу Къарданикде федерал джолну къаты бла ариу, 700 адам бирден сыйынырча уллу межгитни бир джылны ичинде ишлетгенди. Ол аны атасына атагъанды.
«Бир кере Дубайда бир аламат межгитде болгъан эдим. Аны асыры бек джаратхандан, ол кёзюуде Аллахдан аллай межгит ишлерге кюч, къарыу тилеген эдим. Аллахны болушлугъу бла ол муратыма джетдим. Аллах буюрса, быллай ишле энтда этерикме», – деди ол.
Терк Башы Тегейни муфтийи Хаджимурат Гацалов Уллу Аллахны энтда бир юйюн ишлетген Юсюпню «Умманы аллында махтаулу ишлери ючюн» деген 1-чи дараджалы орден бла саугъалады. Анга аллай саугъа КъЧР-ни муфтийи Эриккенланы Мухаммат хаджи да этди.
Правительствосуну Председателини орунбасары Сюйюнчланы Ханафий да Чотча улуну республиканы башчылыгъыны атындан алгъышлаб, анга Хурмет грамота берди.
Межгитни ачылгъанына аталгъан къууанчда Къур′ан окъугъанланы арасында эришиуле да бардырылдыла.
Эришиулеге къошулгъан талай адам Къур′андан суурала бла аятланы окъудула. Алай болса да, Чечен Республиканы Аргун шахарында хафизлени Табарик Байсултанованы атын джюрютген школуну окъуучусу Ахмед Дадаевден ариу окъугъан болмады. Сюдю анга 1-чи орунну берди. 2-чи орунну КъЧР-де Эриккенланы Мухаммат хаджини къолунда медресени бошагъан Саидабдулло Тошов, 3-чю орунну да Татарстанны келечиси Тимур Алашеев алдыла. Хорламлы болгъаннга 1 мелиуан сомгъа, ёчлю орунланы алгъанлагъа да 750 сом бла 500 сомгъа сертификатла берилдиле.
Джыйылгъан джамагъат, уллу джоюм этиб, бизни республикабызда бу ариу, аламат межгитни ишлетген джашха, саулукъ-эсенлик тилей, джума намазларын да алайда къылыб чачылды.
(БИЗНИ КОРР.).
