Къарачай шахар бла Майкопну арасында джолну джангыртыу барады. Ол кърал магъанасы болгъан джолду. Аны юсюнден КъЧР-ни Башчысы Темрезланы Рашид МАХ-да кесини каналында джазгъанды.

Белгилисича, регионну ёсюмюню тамалы асыулу, къоркъуусуз джолладыла. Ол себебден таймаздан алагъа ремонт этилгенлей турады. Бусагъатда «Майкоп-Карачаевск» трассаны узунлугъу 5,1 километр болгъан кесегин джарашдырыу къызыудады. Былтыр джолну 1,5 километрине ремонт этилген эди, энди 3,6 километрин къолгъа алгъандыла.
Преградна бла Псеменни арасындады ол. Аны бла бирге бу джолну Къобу Башы элде кесегин да джарашдырыу барады.
Бу ишге джол бергенле «Джашау-турмуш таблыкъла» деген миллет проект бла «Бирикген Эресей» партияны программасыды. Темрезланы Рашид айтханнга кёре, улоу джюрюген башха джолланы да джарашдырыугъа тыйыншлы эс бёлюнеди. Сёз ючюн, Къарачай шахардан Учкуланнга баргъан джолну да 5 километрине къарала турады.
План бла быйыл джылны аягъына дери улоу джюрюген 38 километр джолгъа ремонт этилликди.
Черкесскеде бютеулей да узунлугъу 7 километр болгъан 18 джол кесек джарашдырыллыкъды.