Хычаман (май) айны 12-де Социалист Урунууну Джигити, СССР-ни Баш Советини эки чакъырыууну да депутаты, белгили кърал эмда джамагъат къуллукъчу, республикада уллу сыйы болгъан адамланы бири Абубекир Дадымович Аргуновну 110-джыллыгъына аталыб, Къарачай-Черкесияда эсгериу ишле бардырылгъандыла.

Алгъы бурун джамагъат Хабез районну Кош-Хабль элинде Абубекир Аргуновну эсгертмесине гокка хансла салгъанды. Ызы бла элни Джарыкълыкъ юйюнде Социалист Урунууну Джигитини 110-джыллыгъына аталгъан джыйылыу ётгенди. Джарыкълыкъ юйню фойесинде Абубекир Аргуновну джашау эмда урунуу джолундан, джетишимлеринден, джамагъат ишлеринден, Къарачай-Черкесияны ёсюмюне юлюш къошханындан хапар айтхан кёрмюч къуралгъан эди.
Джыйылыугъа КъЧР-ни Башчысы Темрезланы Рашид, РФ-ны Федерал Джыйылыууну Федерация Советини членлери Салпагъарланы Ахмат бла Крым Казаноков, КъЧР-ни Халкъ Джыйылыууну (Парламентини) Председатели Александр Иванов, КъЧР-ни Правительствосуну Председатели Мурат Аргунов, КъЧР-ни Башчысыны эмда Правительствосуну Администрациясыны тамадасы Мурат Озов, Правительствону къуллукъчулары, шахарла бла районланы башчылары, джамагъат эмда дин къуллукъучула, районда джашагъанла, Абубекир Аргуновну джууукълары, тенглери къошулгъан эдиле.

Джыйылгъанла Абубекир Аргуновну джууаблы, терен акъыллы, тутхан ишин бет джарыкълы баджаргъан адамча эслерине тюшюргендиле. Ол, къазауатны къыйын джолларындан ётюб, туугъан джуртуна къайтыб, джашауун эл мюлк санагъатны айнытыугъа атагъанды. 45 джылдан аслам заманны колхозгъа башчылыкъ этиб тургъанды. Абубекир Аргуновну кючю эмда адамланы бирикдиргени бла колхоз къралны алчы мюлклерини тизимине тюшгенди.
Къарачай-Черкесияны Башчысы Темрезланы Рашид, джыйылгъанланы алларында сёлеше, Абубекир Аргуновну аты урунууда джигерликни, адамлыкъны, халал къуллукъ этиуню белгиси болуб, ёмюрлюкге къаллыгъын чертгенди.
«Къазауатны къыйынлыгъын да кёрюб, андан сора туугъан джуртунда эл мюлк санагъатны айнытыр джанындан кюрешгенди. 45 джылдан артыкъны колхозну тамадасы болуб, аны атын къралгъа белгили этгенди. Алай бла, мийик джетишимлери ючюн, Абубекир Аргунов «Социалист Урунууну Джигити» деген атха тыйыншлы болгъанды. Джамагъатны арасында сыйы уллу эди, не заманда да адамлагъа къайгъырыуну баш оруннга салгъанды. Миллетни арасында анга «Пата» (халал джюрекли, акъылман) дегендиле. Колхозну айнытханы бла бирге, аны кючю бла элледе школла, сабий садла, джарыкълыкъ юйле, джолла ишленнгендиле. Абубекир Дадымович не затха да терен эс бёлгенди, джаш башчылагъа да болушханды. Къыйын кёзюуледе джууаблылыкъны бойнуна алгъанды. Ол керти интернационалист эди. Аны республиканы тышында да иги таный эдиле. Абубекир Аргунов Къарачай-Черкесияны кючю бирликде эмда джарашыулукъда болгъанынын иги ангылай эди», – дегенди КъЧР-ни Башчысы Темрезланы Рашид.
Джыйылгъанланы алларында Абубекир Аргуновну джашы, Хабез гипс заводну баш директору, Эресейни эмда КъЧР-ни махтаулу къурулушчусу, «За заслуги перед Карачаево-Черкесской Республикой» деген орденни иеси Олег Аргунов да сёлешгенди. Ол атасыны юсюнден хапар айтханды, джыйылыугъа къошулгъанлагъа разылыгъын билдиргенди.
Аны ызы бла сёз КъЧР-ни Халкъ Джыйылыууну Председатели Александр Ивановгъа берилгенди. Ол да Социалист Урунууну Джигити Абубекир Аргуновгъа сый-махтау бериб сёлешгенди, аны Къарачай-Черкесияны ёсюмюне тыйыншлы юлюш къошханын чертгенди.
Джыйылыугъа къошулгъанла чертгенден, Абубекир Аргуновну джашау, урунуу джоллары Къарачай-Черкесияны бюгюннгю эмда ёсюб келген тёлюлерине юлгюдю.

САЛПАГЪАРЛАНЫ Умар.