Хычаман (май) айны 9-да, къралыбызны башха регионларындача, Къарачай-Черкесияда да Уллу Хорламны 81-джыллыгъы белгиленди.
ГОККА ХАНСЛА САЛДЫЛА
Эртденбла сагъат 9 бола Черкесск шахарны ара майданы Уллу Ата джурт къазауатда Хорламны джууукълашдырыб кюрешгенлени разылыкъ бла эсгерирге излегенледен толгъан эди.
Джыйылгъанла, Къарачай-Черкесияны Башчысы Темрезланы Рашид да алларында, Ата джурт къазауатны къанлы урушларында джигитликле этиб, бизге бу рахат джашауну саугъа этгенлеге разылыкъларын билдире, Ёмюрлюк махтауну джукъланмазлыкъ отуну къатына гокка хансла салдыла. Алайда КъЧР-ни Халкъ Джыйылыууну (Парламентини) Председатели Александр Иванов, республиканы Правительствосуну Председатели Мурат Аргунов, КъЧР-ни Башчысыны эмда Правительствосуну Администрациясыны тамадасы Мурат Озов, РФ-ны КъЧР-ден сенаторлары Салпагъарланы Ахмат бла Крым Казаноков, Кърал Думаны депутаты Ёзденланы Солтан, РФ-ны Президентини ШКФО-да Толу эркинликли келечиси Тимур Макоев, Черкесск шахарны мэри Алексей Баскаев, КъЧР-ни Халкъ Джыйылыууну (Парламентини) депутатлары, республиканы Правительствосуну къуллукъчулары, башха кърал органланы тамадалары бар эдиле.
Республиканы башчылыгъына СВО-ну ветеранлары, джамагъат бирлешликлени келечилери, джаш тёлю, Черкесскеде джашагъанла эмда къонакъла къошулгъан
эдиле.
Къарачай-Черкесияны Башчысы Темрезланы Рашид Уллу Хорламны быйылгъы байрамын белгилеуню юсюнден МАХ мессенджерде кесини каналында: «Хорламлы болгъан джигитлерибизни алларында баш иебиз. Бюгюнлюкде рахат джашаб, халал урунуб алгъан къыйыныбызгъа сабийле ёсдюрюр мадарыбыз болгъаны ючюн, алагъа разылыгъыбызны билдиребиз. Аланы кючлери бла къралыбыз кеси башына эркинди, аны тамблагъы кюню да ышаннгылыды. Ёмюрлюк махтауну джукъланмазлыкъ оту, ёлгенлеге тюл, саулагъа, тарихибизни эсгертирге деб, джанады.
Джигитлени балалары, ата-бабаларыны сырларына тарта, тюзлюкню джолу бла барадыла. Ала бюгюнлюкде да, къралыбызны миллетчиледен джакълай, Ата джуртубузгъа кертиликлерин кёргюзедиле.
Биз ёлгенлерибизни хар заманда да эсгерирге, ала кёргюзген джол бла барыргъа борчлубуз. Эресейни джигитлерине ёмюрлюк махтау! Аланы эсгергенлей, ала бла ёхтемленнгенлей турлукъбуз», – деб джазгъанды.
МИТИНГ
Мемориалгъа гокка хансла салыннгандан сора джамагъат Черкесск шахарны ара майданына къайтды.
Къууанч джыйылыуну аллы бла республиканы аскер комиссары Сергей Белобородов Къарачай-Черкесияны Башчысы Темрезланы Рашидге Уллу Хорламны 81-джыллыгъына аталгъан митингни ачаргъа не да хазыр болгъанын айтды.
Сора, адетдеча, Эресей Федерация бла Къарачай-Черкесияны гимнлери согъула, джыйылгъанланы алларына Эресей Федерация бла Къарачай-Черкес Республиканы байракълары чыгъарылдыла. Алай бла, Уллу Хорламны 81-джыллыгъына аталгъан къууанч башланды.
Республиканы Башчысы Темрезланы Рашид, хошкелди айта, джамагъатны байрам бла алгъышлады.
Алайда РФ-ны Президенти Владимир Путинни КъЧР-ни Башчысына эмда джамагъатына алгъышлауу да окъулду.
«Бу байрамны хар джыл сайын да фашистлеге бой бермей, Ата джуртубузну къоруулагъан, бютеу дунияда рахатлыкны сакълагъан къарт аталарыбызны джигитликлери бла ёхтемлене белгилейбиз. Аланы тёзюмлюлюклери, тюзлюк орун алыр ючюн къаджыкъмай кюрешгенлери, Ата джуртха сюймекликлери бизге юлгю болгъанлай турады», – деб джазылгъан эди Президентни телеграммасында.
Аллай алгъышлаула РФ-ны Правительствосуну Председатели Михаил Мишустин, РФ-ны Федерация Советини Председатели Валентина Матвиенко, РФ-ны Кърал Думасыны Председатели Вячеслав Володин, РФ-ны Президентини Администрациясыны Башчысы Антон Вайно, РФ-ны Президентини Шимал Кавказ федерал округда Толу эркинликли келечиси Юрий Чайка дагъыда башхала джибергенлерин да айтыб, КъЧР-ни Башчысы Темрезланы Рашид Уллу Хорламны кюню тёлюлени бирикдирген сыйлы байрамыбыз болгъанын чертди.
«Бу кюн къралыбызны тарих орузламасында эм сыйлы байрамыбызды. Джылдан джылгъа биз хорламлы болгъан адамларыбызны джигитликлерин бегирек ангылай барабыз. Бизни республикабыз да къошулуб, бютеу кърал джигитлерибизге разы болгъаныбызны билдиребиз.
Къанлы урушлада ачы сермешле бла, тылда къаджыкъмай урунуу бла джууукълашдырылгъан Хорламны кюню бизге къуру тарих магъаналы кюн тюлдю. Ол тюрлю-тюрлю миллетлени, динлени келечилеринден къуралгъан джамагъатыбызны бирлигини тамалыды. Миллетчиледен, кесибизни къралыбыз бла къалмай, бютеу дунияны къутхаргъан джигитлерибиз бла ёхтемленебиз. Къарачай-Черкесияны хар адамы да аланы эсгериуге къошулады.
Къарачай-Черкесия Совет Союзну эмда Эресейни 33 Джигити, Махтауну орденини 8 толу кавалери, кърал саугъала берилген 15 мингден аслам адамы, атлары тарихге алтын харифле бла джазылгъан башха аскерчилери бла сыйлыды», – деб, Темрез улу ветеранлагъа, тылда уруннганлагъа разылыгъын билдирди.
Башчы джамагъатны, къазауатда ёлген джердешлерибизни эсгере, бир такъыйкъаны шош болургъа чакъырды.
Алайда Уллу Хорламны кюню бла митингге джыйылгъанланы СВО-ну ветераны, Шимал Кавказ кърал академияда РФ-ны Джигити Боташланы Къанаматны атын джюрютген Аскер окъуу аралыкъны тамадасы подполковник Рустам Магомедов да алгъышлады. Ол Уллу Хорламны кюню барыбызгъа да бирча магъаналы болгъанын чертиб сёлешди.
Ызы бла джаш тёлюню аскер-патриот ангысын ёсдюрюу бла кюрешген «Авангард» деген аралыкъны келечиси Амир Кенчешаов да 81 джылны мындан алгъа ата-бабаларыбыз уллу джигитликле этгенлерин, бюгюнлюкде СВО-гъа къошулгъанла да, къарт аталарыча, къралыбызны джакълагъанларын, ала бары да ёсюб келген тёлюлеге Ата джуртха кертиликни юлгюсю болгъанларын айтды.
Митингни тамамлай, ара майдан бла байрам маршха къошулгъанла саф-саф ётдюле.
Парадны Эресей Федерацияны ФСБ-ны КъЧР-де Чекчи управлениесини къуллукъчуларыны байракъ элтген къаууму ачды. Аны ызы бла 20096-чы аскер бёлекни парад расчёту эмда РФ-ны Къоруулау министерствосуну 34-чю гвардиячы мараб атыучу бригадасыны, КъЧР-ни МВД-ны, РФ-ны МЧС-ни КъЧР-де Баш управлениесини, МВД-ны ведомстводан тышында къараууллукъ этген къуллугъуну, ФСИН-ни регионал бёлюмюню, Сюдю приставланы федерал къуллугъуну КъЧР-де управлениесини къауумлары, Шимал Кавказ кърал академияда РФ-ны Джигити Боташланы Къанаматны атын джюрютген Аскер окъуу аралыкъны 2 къаууму, Къобан къазакъ аскерлени Баталпашинск бёлюмню, Черкесскеде 1-чи номерли штаб постну, Технология колледжни, Эресейни ДОСААФ-ны КъЧР-де бёлюмюню, Черкесск шахарны «Подвиг» деген излеучю бёлеги бла джаш тёлюню аскер-патриот ангысын ёсдюрюу бла кюрешген «Авангард» деген аралыгъыны, «Пластун» деген аскер-патриот къазакъ клубну, Черкесскеде клисаны келечилери ётдюле. Къууанч маршны Черкесск шахарда «ВОИН» деген аскер-патриот клубуну кичи отряды тамамлады.
Алай бла, Уллу Хорламны 81-джыллыгъына аталгъан митинг къууанч халда ётдю. Параддан сора джыйылгъанланы бир къаууму, 80 джылны мындан алгъа къралыбызны баш бошлугъу, рахат джашауу ючюн джанларын берген джигитлени эсгере, Ёмюрлюк махтауну джукъланмазлыкъ отуну къатына гокка хансла салыргъа, ол борчларын эртденнгиде бергенле да Черкесск шахарны «Джашил айрымкан» деген солуу эмда джарыкълыкъ паркына атландыла.
Паркда алагъа бек кёб тюрлю джарыкълыкъ иш къуралгъан эди. Солдат шатыргъа къайтханланы уа баста бла да сыйлай эдиле. Адамла, ауузланнган да этиб, патриот джырлагъа тынгылай, Ата джурт къазауатха къошулгъан адамларын эсгердиле.
БАЙРАМКЪУЛЛАНЫ Зульфия.
